बेळगाव जिल्ह्यातील ज्येष्ठ दलित नेते, सामाजिक कार्यकर्ते आणि काँग्रेसचे पक्षाचे वरिष्ठ पदाधिकारी मल्लेश चौगुले यांची कर्नाटक प्रदेश काँग्रेस समिती (KPCC) SC विभागाच्या राज्य संचालकपदी नियुक्ती करण्यात आली आहे. ही नियुक्ती केपीसीसी SC विभागाचे प्रदेशाध्यक्ष तथा माजी आमदार धर्मसेन यांनी जाहीर केली.
मल्लेश चौगुले यांनी अनेक वर्षांपासून काँग्रेस पक्षाच्या संघटनात्मक बांधणीसाठी सातत्याने काम केले आहे. पक्षाच्या विविध निवडणुकांमध्ये सक्रिय भूमिका बजावत त्यांनी संघटन विस्तारासाठी महत्त्वाचे योगदान दिले आहे. यापूर्वी त्यांनी काँग्रेस सेवा दल तसेच काँग्रेस SC-ST विभागाचे जिल्हाध्यक्ष म्हणूनही जबाबदारी सांभाळली आहे.
सामाजिक क्षेत्रातही चौगुले यांचे कार्य उल्लेखनीय मानले जाते. दलित समाजाच्या प्रश्नांवर सातत्याने काम करत त्यांनी युवक आणि सामाजिक चळवळींमध्ये सक्रिय सहभाग नोंदविला आहे. त्यांच्या कार्याची दखल घेत मलेशिया येथील क्वालालंपूरमध्ये आयोजित आंतरराष्ट्रीय दलित साहित्य परिषदेत त्यांना 'भारतरत्न डॉ. बाबासाहेब आंबेडकर सामाजिक रत्न पुरस्कार' प्रदान करण्यात आला होता.
याशिवाय भारत सरकारचा राष्ट्रीय युवा पुरस्कार, कर्नाटक सरकारचा राज्य युवा पुरस्कार तसेच विविध सामाजिक संस्थांकडून अनेक सन्मान त्यांना मिळाले आहेत. सध्या ते अखिल भारतीय दलित युवा संघटना, नवी दिल्लीचे अध्यक्ष म्हणून कार्यरत असून कर्नाटक सरकारच्या विविध शासकीय समित्यांवर सदस्य म्हणूनही काम पाहत आहेत.
काँग्रेस पक्षातील दीर्घकालीन योगदान, सामाजिक बांधिलकी आणि दलित चळवळीत केलेल्या कार्याचा गौरव म्हणून त्यांची राज्यस्तरीय पदावर नियुक्ती करण्यात आल्याची भावना पक्षातील कार्यकर्त्यांनी व्यक्त केली आहे. त्यांच्या निवडीबद्दल राजकीय, सामाजिक आणि विविध क्षेत्रांतून अभिनंदनाचा वर्षाव होत आहे.
