बेळगाव : जायंटस सप्ताहाचा शुभारंभ बालिका आदर्श विद्यालय येथे उत्साहपूर्ण वातावरणात करण्यात आला. सप्ताहाच्या प्रारंभानिमित्त आयोजित करण्यात आलेल्या व्हॉलीबॉल स्पर्धेला खेळाडू आणि उपस्थितांचा उत्स्फूर्त प्रतिसाद मिळाला.
प्रसिद्ध डेव्हलपर व बिल्डर आर. एम. चौगुले आणि अध्यक्ष लक्ष्मण शिंदे यांच्या हस्ते व्हॉलीबॉल स्पर्धेच्या नेटचे पूजन करून स्पर्धेला सुरुवात करण्यात आली.
यावेळी पूजा प्रवीण त्रिवेदी, फेडरेशन ऑफिसर डोणकरी, मुख्याध्यापक तसेच फेडरेशन ऑफिसर सुनील मुतगेकर यांच्यासह पदाधिकारी आणि मान्यवर उपस्थित होते.
स्पर्धेत सहभागी झालेल्या संघांनी मैदानावर दमदार खेळाचे प्रदर्शन केले. विजेत्या संघांना स्मृतिचिन्ह (मोमेंटो) आणि प्रशस्तीपत्रक देऊन गौरविण्यात आले. हा पुरस्कार वितरण सोहळा को-ऑर्डिनेटर अशोक हलगेकर, उपाध्यक्ष अरुण काळे, डायरेक्टर राहुल बेलवलकर, आकाश लाटूकर, जयवंत पाटील, प्रदीप चव्हाण आणि सचिव विश्वास पवार यांच्या हस्ते पार पडला.
जायंटस सप्ताहाची सुरुवात क्रीडा स्पर्धेने झाल्याने विद्यार्थ्यांमध्ये उत्साहाचे वातावरण निर्माण झाले. सप्ताहादरम्यान विविध सामाजिक, सांस्कृतिक आणि क्रीडा उपक्रमांचे आयोजन करण्यात येणार असल्याची माहिती यावेळी देण्यात आली.
