बेळगाव : पाँडिचेरी येथे आयोजित केंद्रीय विद्यालय राष्ट्रीय स्केटिंग स्पर्धेत बेळगाव जिल्हा रोलर स्केटिंग असोसिएशनच्या स्केटर्सनी उल्लेखनीय कामगिरी केली. सर्वेश रुपेश पाटील आणि कुलदीप बिर्जे यांनी आपल्या उत्कृष्ट खेळाचे प्रदर्शन करत एकूण 3 सुवर्ण आणि 1 रौप्यपदक पटकावले.
या राष्ट्रीय स्तरावरील स्पर्धेत देशभरातून 500 हून अधिक स्केटर्सनी सहभाग घेतला होता. त्यामध्ये बेळगावच्या दोन्ही खेळाडूंनी दमदार कामगिरी करत जिल्ह्याच्या शिरपेचात मानाचा तुरा रोवला.
सर्वेश रुपेश पाटील याने उत्कृष्ट कामगिरी करत 2 सुवर्णपदके मिळवली. तर कुलदीप बिर्जे याने 1 सुवर्ण आणि 1 रौप्यपदक पटकावत यश संपादन केले.
दोन्ही खेळाडू स्केटिंग प्रशिक्षक सूर्यकांत हिंडलगेकर, योगेश कुलकर्णी, विठ्ठल गंगणे, विश्वनाथ येल्लूरकर आणि सोहम हिंडलगेकर यांच्या मार्गदर्शनाखाली नियमित सराव करत आहेत.
या यशामागे डॉ. प्रभाकर कोरे, माजी आमदार शाम घाटगे, राज घाटगे, उमेश कलघटगी, प्रसाद तेंडुलकर, कर्नाटक रोलर स्केटिंग असोसिएशनचे सचिव इंदुधर सीताराम तसेच दोन्ही खेळाडूंच्या आई-वडिलांचे प्रोत्साहन लाभले आहे.
राष्ट्रीय स्तरावर मिळवलेल्या या यशामुळे सर्वेश आणि कुलदीप यांचे सर्वत्र कौतुक होत असून, त्यांच्या पुढील वाटचालीसाठी शुभेच्छा दिल्या जात आहेत.
