बेळगाव : चन्नेवाडी (ता. खानापूर) येथील मूळ रहिवासी आणि सध्या अनगोळ, बेळगाव येथे वास्तव्यास असलेली आकांक्षा नारायण पाटील हिने भारतीय चार्टर्ड अकाउंटंट्स संस्था (ICAI) द्वारे घेण्यात आलेल्या सीए (Chartered Accountant) अंतिम परीक्षेत यश संपादन करत आपल्या कुटुंबाचा आणि गावाचा मान उंचावला आहे.
आकांक्षाने पी. जी. भागवत एलएलपी या प्रतिष्ठित संस्थेत इंटर्नशिप पूर्ण केली असून, तिला सीए महादेव शेवडे आणि सीए श्रीनिवास देशपांडे यांचे मार्गदर्शन लाभले. तिच्या चिकाटी, मेहनती आणि सातत्यपूर्ण प्रयत्नांचे हे फलित असल्याचे तिच्या सहकाऱ्यांनी सांगितले.
आकांक्षा ही चन्नेवाडी येथील प्रगतशील शेतकरी मल्लाप्पा नारायण पाटील यांची कन्या तर चापगाव येथील कृष्णा एस. पाटील यांची नात आहे. तिच्या या यशामुळे चन्नेवाडी आणि आसपासच्या परिसरात आनंदाचे वातावरण आहे.
आकांक्षाचे यश हे ग्रामीण भागातील विद्यार्थ्यांसाठी प्रेरणादायी ठरत असून, परिश्रम आणि योग्य मार्गदर्शनाने कोणतेही स्वप्न साकार करता येते हे तिने आपल्या कामगिरीतून सिद्ध केले आहे.
