बेळगाव : अखिल भारतीय काँग्रेस समितीच्या (AICC) मागासवर्गीय महिला विभागाच्या नवनियुक्त राष्ट्रीय सरचिटणीस आणि गोवा राज्याच्या प्रभारी वैशाली सुतार यांचा कर्नाटक सरकारच्या उप्पार समाज विकास महामंडळाचे अध्यक्ष भरण्णा उप्पार यांच्या नेतृत्वाखाली विशेष सत्कार करून अभिनंदन करण्यात आले.
समाजकारण आणि राजकारणाच्या क्षेत्रात सातत्याने कार्य करत राष्ट्रीय पातळीवर महत्त्वाची जबाबदारी मिळवणाऱ्या वैशाली सुतार यांच्या यशाचे यावेळी कौतुक करण्यात आले. त्यांच्या या नियुक्तीमुळे महिला आणि तरुण पिढीला सार्वजनिक जीवनात पुढे जाण्यासाठी प्रेरणा मिळेल, असा विश्वास महामंडळाचे अध्यक्ष भरण्णा उप्पार आणि समाजातील ज्येष्ठ नेत्यांनी व्यक्त केला.
सत्काराला उत्तर देताना नवनियुक्त राष्ट्रीय सरचिटणीस वैशाली सुतार यांनी, आपल्यावर विश्वास ठेवून महत्त्वाची जबाबदारी सोपविल्याबद्दल काँग्रेसच्या वरिष्ठ नेत्यांचे तसेच सातत्याने पाठिंबा देणाऱ्या समाजबांधवांचे मनःपूर्वक आभार मानले.
वैशाली सुतार यांच्या नियुक्तीमुळे त्यांच्या समर्थकांमध्ये आणि समाजामध्ये आनंदाचे वातावरण असून, त्यांच्या पुढील वाटचालीसाठी शुभेच्छा व्यक्त करण्यात आल्या.
