महाराष्ट्र एकीकरण युवा समिती सीमाभागच्या पदाधिकाऱ्यांनी मराठी एकीकरण समिती महाराष्ट्र राज्यच्या मीरारोड येथील मध्यवर्ती कार्यालयात अध्यक्ष श्री. गोवर्धन देशमुख आणि त्यांच्या सहकाऱ्यांची सदिच्छा भेट घेतली.
गेल्या १०-१२ वर्षांपासून महाराष्ट्रात मराठीचा आवाज बुलंद करण्यासाठी मराठी एकीकरण समिती सातत्याने संघर्ष करत आहे. तसेच बेळगावसह सीमाभाग महाराष्ट्रात सामील व्हावा यासाठी मराठी बांधवांचा ७० वर्षांहून अधिक काळ लोकशाही मार्गाने लढा सुरू आहे.
या पार्श्वभूमीवर सीमाभागातील मराठी अस्मितेच्या प्रश्नाला संपूर्ण महाराष्ट्राचे बळ मिळावे, यासाठी राज्यभर व्यापक जनजागृती करून नव्या लोकचळवळीची उभारणी करण्याबाबत सविस्तर चर्चा करण्यात आली.
या बैठकीत मराठी भाषा, मराठी संस्कृती, मराठी अस्मिता आणि सीमाभागातील मराठी बांधवांच्या न्याय्य हक्कांसाठी संयुक्तपणे संघर्ष करण्याचा निर्धार करण्यात आला.
मराठी एकीकरण समिती महाराष्ट्र राज्य आणि महाराष्ट्र एकीकरण युवा समिती सीमाभाग यांच्या संयुक्त विद्यमाने राज्यभर जनजागृती, संघटनबांधणी आणि लोकसहभागातून मराठी एकीकरणाचा व्यापक लोकलढा उभा करण्याचा महत्त्वपूर्ण निर्णय घेण्यात आला.
एकच ध्यास — मराठीचा सन्मान, सीमाभागाचा न्याय आणि अखंड महाराष्ट्राचा स्वाभिमान!
