बेळगाव : शाहापूर येथील KLE आयुर्वेदिक रुग्णालयाच्या मागील परिसरात भटक्या कुत्र्यांनी केलेल्या हल्ल्यात मोर जखमी झाल्याची घटना समोर आली. घटनेची माहिती मिळताच Social Worker Rescue Team Belgaumच्या सदस्यांनी तातडीने घटनास्थळी धाव घेत जखमी मोराची सुटका केली.
जखमी मोराला भटक्या कुत्र्यांच्या तावडीतून सुरक्षित बाहेर काढून टीमच्या सदस्यांनी उपचारासाठी कोल्हापूर सर्कलजवळील Soulmate Pet Clinic येथे नेले. तेथे पशुवैद्यकीय डॉक्टरांनी मोरावर तातडीने प्राथमिक उपचार केले. विशेष म्हणजे हे उपचार विनामूल्य करण्यात आले.
उपचारानंतर जखमी मोराला पुढील उपचार व पुनर्वसनासाठी वन विभागाच्या अधिकाऱ्यांच्या स्वाधीन करण्यात आले.
या बचावकार्यामध्ये अवधूत तुडवेकर, पद्मप्रसाद हूळी, विकी मेहता, प्रथमेश साळोखे आणि धीर मेहता यांनी तत्परतेने सहभाग घेतला.
दरम्यान, या घटनेमुळे बेळगाव शहरातील वाढत्या भटक्या कुत्र्यांच्या समस्येचा मुद्दा पुन्हा ऐरणीवर आला आहे. भटक्या कुत्र्यांमुळे नागरिकांसोबतच शहरातील वन्यजीव आणि पक्ष्यांच्या सुरक्षेचाही प्रश्न निर्माण होत असल्याची चिंता सामाजिक कार्यकर्ते व स्थानिक नागरिकांनी व्यक्त केली.
भटक्या कुत्र्यांची वाढती संख्या नियंत्रित करण्यासाठी तसेच नागरिक आणि वन्यजीवांच्या सुरक्षिततेसाठी संबंधित प्रशासनाने प्रभावी उपाययोजना तातडीने हाती घ्याव्यात, अशी मागणी करण्यात येत आहे.
