कार्यक्रमाच्या अध्यक्षस्थानी शाळेचे मुख्याध्यापक आर. आर. कुडतुरकर होते. प्रमुख पाहुणे म्हणून रोटरी क्लबचे अध्यक्ष डॉ. गोविंद मिसाळे, प्रा. प्रणव पित्रे, ज्येष्ठ रोटेरियन विनय बेहरे तसेच रोटेरियन कामत उपस्थित होते.
कार्यक्रमाची सुरुवात इंटरॅक्ट क्लबचे शिक्षक एस. एस. कोष्टी यांच्या प्रास्ताविकाने झाली. मान्यवरांचे स्वागत मुख्याध्यापकांच्या हस्ते पुष्पगुच्छ देऊन करण्यात आले.
यावेळी डॉ. गोविंद मिसाळे यांनी विद्यार्थ्यांना मार्गदर्शन करताना शिस्त, उत्तम आरोग्य, वेळेचे योग्य नियोजन आणि अभ्यासातील सातत्य यांचे महत्त्व अधोरेखित केले. “विद्यार्थ्यांनी शिक्षणाच्या बळावर आपल्या कुटुंबासह समाज आणि देशाचे नाव उज्ज्वल करावे,” असे त्यांनी आवाहन केले. विनय बेहरे यांनीही विद्यार्थ्यांना प्रेरणादायी संदेश दिला.
या उपक्रमांतर्गत आई किंवा वडील नसलेल्या 16 विद्यार्थ्यांना प्रत्येकी 2000 रुपयांचे धनादेश प्रदान करण्यात आले. तसेच आर्थिकदृष्ट्या दुर्बल पण गुणवान अशा 17 विद्यार्थ्यांना शालेय फी भरण्यासाठी प्रत्येकी 2900 रुपये रोख स्वरूपात देण्यात आले. एकूण 33 विद्यार्थ्यांना या माध्यमातून शैक्षणिक मदत मिळाली.
कार्यक्रमाला विद्यार्थ्यांचे पालक, शिक्षक आणि रोटरी सदस्य उपस्थित होते. सूत्रसंचालन सी. वाय. पाटील यांनी केले, तर आभार प्रदर्शन के. एम. गुरव यांनी केले.
शिक्षणाच्या प्रवासात आर्थिक अडचणी अडथळा ठरू नयेत, यासाठी रोटरी क्लबचा हा उपक्रम विद्यार्थ्यांसाठी निश्चितच प्रेरणादायी ठरला आहे.
