कर्नाटक मंत्रिमंडळाच्या अलीकडील पुनर्रचनेनंतर भ्रष्टाचाराच्या आरोपांना सामोरे गेलेल्या काही मंत्र्यांना पुन्हा मंत्रिपद देण्यात आल्याच्या पार्श्वभूमीवर भारतीय जनता पक्षाने बेळगावात आंदोलन छेडले.
शहरातील राणी चन्नम्मा चौकात झालेल्या या निदर्शनातून संबंधित मंत्र्यांच्या राजीनाम्याची मागणी करण्यात आली.
भाजपच्या पदाधिकारी आणि कार्यकर्त्यांनी राज्य सरकारच्या निर्णयाविरोधात जोरदार घोषणाबाजी करत नाराजी व्यक्त केली. आंदोलनादरम्यान भ्रष्टाचाराच्या आरोपांमुळे चर्चेत आलेल्या मंत्र्यांना पुन्हा मंत्रिमंडळात स्थान देणे जनतेच्या विश्वासाला तडा देणारे असल्याचा आरोप करण्यात आला.
या आंदोलनात विधान परिषद सदस्य लिंगराज पाटील, भाजप जिल्हाध्यक्ष सुभाष पाटील, माजी आमदार संजय पाटील, विश्वनाथ पाटील, महांतेश दोड्डगौडर, अरविंद पाटील, महानगर जिल्हाध्यक्ष गीता सुतार, जिल्हा सरचिटणीस मल्लिकार्जुन मादम्मनवर, संदीप देशपांडे, धनश्री देसाई यांच्यासह अनेक पदाधिकारी आणि कार्यकर्ते सहभागी झाले.
आंदोलनादरम्यान संबंधित मंत्र्यांना तत्काळ पदमुक्त करण्याची मागणी करत राज्य सरकारने नैतिक जबाबदारी स्वीकारावी, अशी भूमिका भाजपच्या नेत्यांनी मांडली.
