बेळगाव :
बेळगावातील जैन कॉलेज ऑफ इंजिनिअरिंग अँड रिसर्च (JCE&R) मध्ये १२ आणि १३ नोव्हेंबर २०२५ रोजी राष्ट्रीय स्तरावरील ‘सविष्कार २०२५’ तांत्रिक-सांस्कृतिक उत्सव मोठ्या उत्साहात आयोजित करण्यात येत आहे, अशी माहिती संस्थेचे प्राचार्य व संचालक डॉ. एस. व्ही. गोरबाळ यांनी पत्रकार परिषदेत दिली.
या दोन दिवसीय उत्सवात देशभरातील विविध अभियांत्रिकी महाविद्यालयांमधील विद्यार्थी सहभागी होणार असून, त्यांच्या तांत्रिक कौशल्य, सर्जनशीलता आणि सांस्कृतिक प्रतिभेचा भव्य संगम या महोत्सवात पाहायला मिळणार आहे.
कार्यक्रमाचे उद्घाटन बेळगावचे कायदा व सुव्यवस्था उपपोलीस आयुक्त एन. व्ही. भरमणी यांच्या हस्ते होणार असून, अध्यक्षस्थानी डॉ. एस. व्ही. गोरबाळ राहणार आहेत.
⚙️ ‘सविष्कार २०२५’चे आकर्षण:
या उत्सवात रोबो रेस, कोड ब्रेक, पेपर प्रेझेंटेशन यांसारख्या तांत्रिक स्पर्धांसह क्रिकेट, ट्रेझर हंट, मॉक सीआयडी आणि कॉर्पोरेट कार्निवल अशा मनोरंजक उपक्रमांचाही समावेश आहे.
तसेच सांस्कृतिक विभागात रॅम्प वॉक, सोलो आणि ग्रुप डान्स, तसेच गायन स्पर्धा पार पडणार आहेत.
सर्वोत्कृष्ट कामगिरी करणाऱ्या महाविद्यालयाला जनरल चॅम्पियनशिप ट्रॉफी प्रदान केली जाणार आहे.
डॉ. गोरबाळ यांनी सांगितले की, “या भागातील विद्यार्थ्यांना उच्च दर्जाचे शिक्षण मिळावे यासाठी अभियांत्रिकी महाविद्यालयासोबतच एमबीए विभागाची सुरुवात करण्यात आली आहे.”
या प्रसंगी प्रा. प्रकाश सोवळकर, कार्तिक रामदुर्ग, राघवेंद्र कटगल्ल आदी उपस्थित होते.
