कॅम्प झोन विभागीय हायस्कूल व्हॉलीबॉल स्पर्धेत वनिता विद्यालय इंग्लिश मीडियम स्कूलच्या संघाने उत्कृष्ट खेळाचे प्रदर्शन करत विजेतेपद पटकावले. अंतिम सामन्यात वनिता विद्यालयाने सेंट जोसेफ कॉन्व्हेंट स्कूल संघाचा सरळ दोन सेटमध्ये पराभव केला.
कॅम्प झोन उर्दू स्कूलच्या आयोजनाखाली आयोजित करण्यात आलेल्या या स्पर्धेचा अंतिम सामना सेंट पॉल्स स्कूलच्या मैदानावर रंगला. सामन्यात वनिता विद्यालयाच्या खेळाडूंनी सुरुवातीपासूनच आक्रमक खेळ करत सामन्यावर वर्चस्व राखले.
अंतिम सामन्यात वनिता विद्यालयाने सेंट जोसेफ कॉन्व्हेंटवर 25-12 आणि 25-15 अशा गुणफरकाने विजय मिळवत विजेतेपद आपल्या नावावर केले.
स्पर्धेच्या यशस्वी आयोजनासाठी अधिकाऱ्यांनी महत्त्वाची भूमिका बजावली. यामध्ये प्रकाश बजंत्री, ग्रेसी करकडा, महेश पुजारी, अँथनी डिसोझा आणि साकिब बेपारी यांनी काम पाहिले.
वनिता विद्यालयाच्या संघाला विजेतेपद मिळवून देण्यात प्रशिक्षक नगराज भगवंतनावर (कॅम्प झोन अध्यक्ष) यांचे मार्गदर्शन महत्त्वपूर्ण ठरले.
या विजयामुळे शाळेच्या क्रीडा क्षेत्रातील कामगिरीत आणखी एक मानाचा तुरा रोवला गेला आहे.
