बेळगाव : रोटरी क्लब ऑफ बेळगाव साऊथ आणि रोटरी क्लब ऑफ बेळगाव नॉर्थ यांच्या संयुक्त विद्यमाने आयोजित करण्यात आलेली रोटरी महिला क्रिकेट प्रीमियर लीग २०२६ उत्साहपूर्ण वातावरणात आणि खेळाडूवृत्तीच्या उत्कृष्ट प्रदर्शनासह यशस्वीरित्या पार पडली.
या स्पर्धेत पाच रोटरी क्लबच्या महिला संघांनी सहभाग नोंदविला. स्पर्धेतील सर्व सामने अत्यंत चुरशीचे झाले असून महिला सक्षमीकरण, संघभावना आणि रोटरी मैत्रीचे दर्शन घडले.
स्पर्धेच्या अंतिम सामन्यात रोटरी क्लब ऑफ वेणुग्राम संघाने विजेतेपद पटकाविले, तर रोटरी क्लब ऑफ बेळगाव सेंट्रल संघ उपविजेता ठरला.
समारोप समारंभाला डीजीएन रोटेरियन अशोक नाईक प्रमुख पाहुणे म्हणून उपस्थित होते. तसेच सौ. मधुरा भाटकांडे आणि सौ. स्वाती उपाध्ये या मान्यवर पाहुण्या म्हणून उपस्थित होत्या.
यावेळी मान्यवरांनी महिला खेळाडूंचे कौतुक करताना क्रीडा क्षेत्रातील सहभागामुळे नेतृत्वगुण, आत्मविश्वास आणि सामाजिक बांधिलकी वृद्धिंगत होत असल्याचे प्रतिपादन केले.
स्पर्धेचे अध्यक्ष रोटेरियन डॉ. संजीव नाईक तर सह-अध्यक्ष रोटेरियन अजिंक्य पित्रे यांनी स्पर्धेच्या यशस्वी आयोजनासाठी सर्व सहभागी संघ, प्रायोजक, पंच, स्वयंसेवक आणि सहकाऱ्यांचे आभार मानले.
विजेत्या आणि उपविजेत्या संघांना पारितोषिके देऊन गौरविण्यात आले. स्पर्धेच्या यशस्वी आयोजनामुळे रोटरी कुटुंबातील ऐक्य, मैत्री आणि महिला सक्षमीकरणाचा संदेश अधिक दृढ झाल्याची भावना उपस्थितांनी व्यक्त केली.
