चेन्नई येथे नुकत्याच पार पडलेल्या आंतरराष्ट्रीय एशिया पॅसिफिक डाऊन सिंड्रोम फेडरेशन आयोजित जलतरण स्पर्धेत बेळगावच्या मयांक हलदर याने उल्लेखनीय कामगिरी करत भारताचे प्रतिनिधित्व करताना दोन सुवर्णपदकांची कमाई केली आहे. या स्पर्धेत भारतासह तब्बल दहा देशांतील जलतरणपटूंनी सहभाग नोंदवला होता.
मयांक हलदर याने ५० मीटर फ्रीस्टाइल आणि २५ मीटर बॅक स्ट्रोक या दोन्ही प्रकारात सुवर्णपदक पटकावत आपली गुणवत्ता सिद्ध केली. या यशामुळे बेळगाव शहराचा नावलौकिक राष्ट्रीय पातळीवरच नव्हे तर आंतरराष्ट्रीय स्तरावरही उंचावला आहे.
या ऐतिहासिक यशानंतर मयांक हलदर याचे बेळगाव रेल्वे स्थानकावर आगमन होताच आबा स्पोर्ट्स क्लब, हिंदी स्पोर्ट्स क्लब आणि क्रीडा भारती बेळगाव यांच्या संयुक्त विद्यमाने त्याचा जाहीर सत्कार करण्यात आला. यावेळी मयांकचे आई-वडील, त्याचे जलतरण प्रशिक्षक श्री. विश्वास पवार यांच्यासह विशाल वेसने, शुभांगी मंगळूरकर, ज्योती पवार, सुधीर धामणकर, मोहन पत्तार, सूर्यकांत हिंडलगेकर, पद्मप्रसाद हुली, गणेश दडीकर, हर्षाली पाटील, अनंत पाटील तसेच अनेक क्रीडाप्रेमी व मान्यवर उपस्थित होते.
मयांकच्या या यशामुळे विशेष गरजा असलेल्या खेळाडूंना प्रेरणा मिळाली असून, त्याची कामगिरी आगामी पिढीसाठी मार्गदर्शक ठरणारी आहे, असे मत उपस्थित मान्यवरांनी व्यक्त केले.
