बेळगाव : आबा व हिंद स्पोर्ट्स क्लब तसेच क्रीडा भारती बेळगाव यांच्या संयुक्त विद्यमाने तिसऱ्या पीव्हीआर आंतरराज्य निमंत्रित जलतरण स्पर्धेचे भव्य आयोजन करण्यात आले आहे. या स्पर्धा शनिवार दिनांक 7 आणि रविवार दिनांक 8 फेब्रुवारी 2026 रोजी गोवावेस महानगरपालिकेच्या जलतरण तलावात पार पडणार आहेत.
या स्पर्धांमध्ये मुला व मुलींच्या विविध वयोगटांतील जलतरण स्पर्धांचा समावेश असणार असून, बेळगावसह बेंगलोर, गोवा, कोल्हापूर, पुणे, सांगली, हुबळी व धारवाड येथील राष्ट्रीय व आंतरराष्ट्रीय स्तरावर उल्लेखनीय कामगिरी केलेले जलतरणपटू सहभागी होणार आहेत.
स्पर्धेचे आयोजन उच्च दर्जाचे ठेवण्यासाठी सर्व आवश्यक क्रीडा निकष व सुरक्षिततेची काळजी घेतली जात असल्याचे आयोजकांकडून सांगण्यात आले. या स्पर्धांमुळे बेळगाव शहराला जलतरण क्रीडाक्षेत्रात नवी ओळख मिळणार असून नवोदित खेळाडूंना आपली गुणवत्ता सिद्ध करण्याची संधी मिळणार आहे.
या संदर्भात माहिती देताना आबा स्पोर्ट्स क्लबचे जलतरण प्रशिक्षक व स्पर्धेचे इव्हेंट डायरेक्टर श्री. विश्वास पवार यांनी सांगितले की, या स्पर्धा केवळ स्पर्धात्मक नसून, जलतरण क्रीडेला प्रोत्साहन देणारा महत्त्वपूर्ण उपक्रम ठरणार आहेत.
