बेळगाव : जिल्हास्तरीय जुडो स्पर्धेत सरकारी मराठी मुलांची शाळा क्रमांक 5, चव्हाट गल्ली येथील इयत्ता सहावीची विद्यार्थिनी कुमारी स्वरानी प्रसाद गोरल हिने उल्लेखनीय कामगिरी करत 40 किलो वजनी गटात प्रथम क्रमांक पटकावला. स्वरानीच्या या यशामुळे शाळेच्या क्रीडा क्षेत्रातील लौकिकात आणखी भर पडली असून तिच्या कामगिरीचे सर्व स्तरांतून कौतुक होत आहे.
आज पार पडलेल्या जिल्हास्तरीय जुडो स्पर्धेत स्वरानीने आत्मविश्वासाने आणि आक्रमक खेळाचे प्रदर्शन करत प्रतिस्पर्ध्यांवर मात केली. सुरुवातीपासूनच तिने उत्कृष्ट तंत्र, चपळाई आणि संयम दाखवत 40 किलो वजनी गटातील विजेतेपदावर आपले नाव कोरले.
स्वरानीने मिळवलेले हे यश तिच्या सातत्यपूर्ण सराव, मेहनत आणि जिद्दीचे फलित मानले जात आहे. विशेष म्हणजे, सर्वसामान्य शेतकरी कुटुंबातून आलेल्या स्वरानीने जिल्हास्तरावर मिळवलेले हे यश इतर विद्यार्थ्यांसाठीही प्रेरणादायी ठरले आहे.
स्वरानीच्या या उल्लेखनीय कामगिरीबद्दल शाळेतील शिक्षक, गुरुजन तसेच क्रीडाप्रेमींनी तिचे अभिनंदन केले. भविष्यातही तिने अशाच प्रकारे यशाची नवी शिखरे गाठून शाळेचे, आई-वडिलांचे आणि परिसराचे नाव उज्ज्वल करावे, यासाठी तिला शुभेच्छा देण्यात आल्या.
शाळेच्या सर्व गुरुजनांकडून कुमारी स्वरानी प्रसाद गोरल हिचे मनःपूर्वक अभिनंदन करण्यात आले.
