बेळगाव : डी मीडिया
बेळगाव शहरालगत असलेल्या इंडाल्को कंपनी परिसरात एका कामगाराने आत्महत्या केल्याने खळबळ उडाली असून घटनास्थळी तणावाचे वातावरण निर्माण झाले आहे.
मृत कामगाराची ओळख शंकर तळवार (रा. मुत्यानट्टी गाव) अशी झाली आहे. संबंधित कामगार मागील काही वर्षांपासून कंपनीत कार्यरत असल्याची माहिती मिळाली आहे.
प्राथमिक माहितीनुसार, शंकर तळवार यांनी आत्महत्येपूर्वी मोबाईलवर संदेश लिहिल्याचे समोर आले आहे. या संदेशामध्ये त्यांनी नोकरीतील अडचणी आणि काही आरोपांचा उल्लेख केल्याची माहिती आहे. या आरोपांची पोलीस प्रशासनाकडून पडताळणी केली जात आहे.
घटनेची माहिती मिळताच बेळगाव शहराचे पोलीस आयुक्त भूषण बोरसे यांच्यासह वरिष्ठ अधिकारी घटनास्थळी दाखल झाले. परिस्थिती नियंत्रणात ठेवण्यासाठी केएसआरपीच्या तुकड्यांसह मोठा पोलीस बंदोबस्त तैनात करण्यात आला आहे.
या प्रकरणी पोलीस अधिक तपास करत असून, घटनेमागील नेमके कारण तपासानंतर स्पष्ट होणार आहे.
