अथणीत धक्कादायक घटना; पत्नीवरील संशयातून झोपेत असलेल्या महिलेची हत्या
अथणी :
अथणी तालुक्यातील कटकगिरी गावात कौटुंबिक वादातून एका महिलेची निर्घृण हत्या झाल्याची धक्कादायक घटना समोर आली आहे. पत्नीवर संशय घेत पतीने झोपेत असताना तिच्यावर हल्ला केल्याचा आरोप आहे.
मृत महिलेची ओळख शोभा परगोंड सारवाड अशी करण्यात आली आहे. प्राथमिक माहितीनुसार, आरोपी पती परगोंड याने पत्नी झोपलेली असताना धारदार शस्त्राने हल्ला करून तिचा जीव घेतला.
मृत शोभा आणि आरोपी परगोंड हे मूळचे अथणी तालुक्यातील खवटखोप्प गावचे रहिवासी होते. रोजगाराच्या कारणास्तव ते काही काळ अवजीकर मठ परिसरात राहत होते. शोभा मठात स्वयंपाकाचे काम करत होती, तर परगोंड वाहन चालक म्हणून काम करत होता.
मिळालेल्या माहितीनुसार, पती-पत्नीमध्ये गेल्या काही दिवसांपासून कौटुंबिक कारणांवरून वाद सुरू होते. संशय आणि तणावातून ही घटना घडल्याचा प्राथमिक अंदाज पोलिसांकडून व्यक्त करण्यात आला आहे.
घटनेची माहिती मिळताच ग्रामस्थांनी घटनास्थळी धाव घेतली. या प्रकारामुळे परिसरात काही काळ तणावाचे वातावरण निर्माण झाले होते.
अथणी पोलिसांनी घटनास्थळी भेट देऊन पंचनामा केला. मृतदेह शवविच्छेदनासाठी पाठवण्यात आला असून आरोपीला ताब्यात घेऊन पुढील तपास सुरू आहे.
