खानापूर : खानापूर-नंदगड मुख्य मार्गावर मंगळवार (7 ऑक्टोबर 2025) रोजी उशिरा रात्री सुमारे 11 वाजताच्या सुमारास नांवगा क्रॉसजवळ दोन ट्रकांमध्ये झालेल्या जोरदार धडकेत एक चालक गंभीर जखमी झाला. अपघातानंतर रस्त्यावर काही काळ वाहतूक ठप्प झाली होती.
धडकेचा आवाज एवढा प्रचंड होता की परिसरातील नागरिक घटनास्थळी धावून आले. एका ट्रकचा चालक केबिनमध्ये अडकून पडला होता. घटनास्थळी तत्काळ पोहोचलेल्या नंदगड 108 रुग्णवाहिका पथकाने अथक प्रयत्न करून चालकाला बाहेर काढले आणि प्राथमिक उपचारानंतर खानापूर सरकारी रुग्णालयात दाखल केले. नंतर अधिक उपचारासाठी त्याला बेळगाव जिल्हा रुग्णालयात हलविण्यात आले.
https://youtube.com/shorts/tscABFTCbOM?si=CxjxpiOfLJ5rwjGf
दरम्यान, अपघाताचे नेमके कारण अद्याप स्पष्ट झाले नसले तरी, प्राथमिक माहितीनुसार एका वाहनाचा ताबा सुटल्यामुळे धडक झाल्याचा अंदाज व्यक्त केला जात आहे. खानापूर पोलिसांनी घटनास्थळी भेट देऊन पंचनामा केला असून, पुढील तपास सुरू आहे.
या अपघातामुळे काही काळ वाहतुकीची कोंडी निर्माण झाली होती, मात्र पोलिसांच्या तातडीच्या हस्तक्षेपाने रस्ता पुन्हा सुरू करण्यात आला.
