नवी दिल्ली : सामाजिक कार्यकर्ते सोनम वांगचूक यांची उपोषणादरम्यान प्रकृती खालावल्याने त्यांना दिल्लीतील सफदरजंग रुग्णालयात दाखल करण्यात आले आहे. दरम्यान, त्यांच्या पत्नी गीतांजली वांगचूक यांनी उपचारांबाबत महत्त्वाची भूमिका मांडत, आपल्या परवानगीशिवाय कोणतेही औषध तोंडावाटे किंवा शिरेवाटे देऊ नये, अशी मागणी केली आहे.
गीतांजली वांगचूक यांनी सोशल मीडिया प्लॅटफॉर्म 'एक्स' वर पोस्ट करत म्हटले की, "माझी, कुटुंबातील सदस्य आणि त्यांच्या वैद्यकीय सल्लागारांच्या संमतीशिवाय सोनम यांना कोणतेही औषध देण्यात येऊ नये." सध्या त्या स्वतः सफदरजंग रुग्णालयात उपस्थित असून वांगचूक यांच्या प्रकृतीवर लक्ष ठेवत आहेत.
माहितीनुसार, उपोषणाच्या 21व्या दिवशी सोनम वांगचूक यांची प्रकृती अचानक खालावली. त्यानंतर शनिवारी त्यांना तातडीने सफदरजंग रुग्णालयात हलविण्यात आले.
दिल्ली पोलिसांच्या माहितीनुसार, डॉक्टरांच्या शिफारशी आणि दिल्ली उच्च न्यायालयाच्या निर्देशांचे पालन करत त्यांना रुग्णालयात दाखल करण्यात आले आहे. दरम्यान, उपोषणस्थळी उपस्थित आंदोलकांनीही आक्रमक भूमिका घेतली असून, सोनम वांगचूक यांच्यानंतर अभिजीत दीपके यांनी उपोषण सुरू करण्याची घोषणा केली आहे.
