बेळगांव: ठेवीदारांची दिशाभूल करून मोठ्या प्रमाणात निधी उभारल्याचा आरोप असलेल्या आदित्यराज कॅपिटल प्रायव्हेट लिमिटेड या वित्तीय संस्थेवर गुरुवारी प्रशासनाने कारवाई केली. उपविभागीय अधिकारी शरवण नायक यांच्या नेतृत्वाखालील पथकाने शहरातील भाग्यनगर परिसरातील कार्यालयाची तपासणी करत विविध आर्थिक कागदपत्रांची पाहणी केली.
प्राथमिक माहितीनुसार, संस्थेने आकर्षक परताव्याचे आश्वासन देत नागरिकांकडून मोठ्या प्रमाणात ठेवी स्वीकारल्याचा आरोप आहे. मात्र, त्या ठेवींना आवश्यक सुरक्षा किंवा हमी न देता जमा झालेल्या निधीचा इतरत्र वापर करण्यात आल्याची तक्रार संबंधित यंत्रणांकडे करण्यात आली होती.
या प्रकरणी संस्थेविरोधात केपीआयडी तसेच बड्स सेलमध्ये तक्रारी दाखल झाल्यानंतर प्रशासनाने तपासाची सूत्रे हाती घेतली. त्यानुसार अधिकाऱ्यांच्या पथकाने कार्यालयात जाऊन आर्थिक व्यवहारांशी संबंधित नोंदी आणि दस्तऐवजांची छाननी केली.
कारवाईदरम्यान कायदा व सुव्यवस्था राखण्यासाठी टिळकवाडी पोलिस ठाण्याच्या कर्मचाऱ्यांची मदत घेण्यात आली. संस्थेच्या आर्थिक व्यवहारांचा सखोल तपास सुरू असून, चौकशी पुढे सरकल्यानंतर आणखी महत्त्वाची माहिती समोर येण्याची शक्यता व्यक्त करण्यात येत आहे.
