मालमत्तेच्या वादातून कुटुंबावर जीवघेणा हल्ला; एक जखमी
चिंचली (ता. रायबाग, जि. बेळगाव):
मालमत्तेच्या वादातून रस्त्यावरच मारहाण झाल्याची धक्कादायक घटना रायबाग तालुक्यातील चिंचली शहरात घडली आहे. येथील रहिवासी सुनिल सगरें व त्यांच्या कुटुंबीयांवर हल्ला करण्यात आल्याची माहिती समोर आली आहे.
प्राथमिक माहितीनुसार, संशयित संजू सौंदलगी व त्यांच्या कुटुंबीयांनी एकत्र येत हा हल्ला केल्याचा आरोप आहे. सुनिल सगरें हे गेल्या अनेक वर्षांपासून चिंचली येथील सर्व्हे क्रमांक 1014/1, 1014/2, 1014/3 आणि 1014/4 या मालमत्तेवर वास्तव्यास आहेत. या मालमत्तेवर आपलाही हक्क असल्याचा दावा करत वाद वाढला आणि त्याचे रूपांतर हिंसाचारात झाले.
या हल्ल्यात सुनिल सगरें यांच्या डोक्याला गंभीर दुखापत झाली असून त्यांना तत्काळ हारुगिरी येथील रुग्णालयात उपचारासाठी दाखल करण्यात आले आहे. दरम्यान, सुनिल सगरें यांच्या पत्नीने हल्लेखोरांविरोधात गंभीर आरोप केले आहेत.
घटनेची माहिती मिळताच कुडची पोलिस ठाण्याच्या अधिकाऱ्यांनी घटनास्थळी भेट देत पाहणी केली. ही घटना कुडची पोलिस ठाण्याच्या हद्दीत घडली असून पुढील तपास सुरू आहे.
