बेळगांव ग्रामीण पोलिसांनी चोरी आणि सराईत गुन्ह्यांविरोधातील कारवाईत महत्त्वाचे यश मिळवत एका संशयिताला अटक केली असून त्याच्याकडून सुमारे ₹4.78 लाख किमतीचे 34 ग्रॅम वजनाचे सोन्याचे दागिने जप्त केले आहेत. या कारवाईमुळे बेळगांवसह इतर जिल्ह्यांतील काही प्रलंबित गुन्ह्यांची उकल होण्यास मदत झाली आहे.
पोलिसांनी दिलेल्या माहितीनुसार, मे महिन्यात पीरनवाडी येथील एका दागिन्यांच्या दुकानात झालेल्या चोरीप्रकरणी बेळगांव ग्रामीण पोलीस ठाण्यात गुन्हा दाखल करण्यात आला होता. या प्रकरणाचा तपास सुरू असताना विशेष तपास पथकाने तांत्रिक माहिती आणि गोपनीय सूत्रांच्या आधारे संशयिताचा माग काढला.
या कारवाईदरम्यान विनायक उर्फ चिराग प्रकाश पाटील (वय 18, मूळ उत्तर गोवा) याला ताब्यात घेण्यात आले. चौकशीत त्याने पीरनवाडीतील दागिन्यांच्या दुकानातील चोरीसह बागलकोट जिल्ह्यातील नवनगर पोलीस ठाणे हद्दीतील चोरी आणि मारिहाळ पोलीस ठाणे परिसरातील निलजीजवळील साखळी चोरीच्या घटनांमध्ये सहभाग असल्याची कबुली दिल्याची माहिती पोलिसांनी दिली.
आरोपीकडून जप्त करण्यात आलेल्या सोन्याच्या दागिन्यांची एकूण किंमत ₹4 लाख 78 हजार इतकी असून त्यांचे वजन 34 ग्रॅम आहे.
ही कारवाई वरिष्ठ पोलीस अधिकाऱ्यांच्या मार्गदर्शनाखाली बेळगांव ग्रामीण पोलीस ठाण्याचे पोलीस निरीक्षक नागनगौडा कट्टीमनिगौडर यांच्या नेतृत्वाखाली विशेष तपास पथकाने केली. तपासात सहभागी अधिकारी, कर्मचारी तसेच तांत्रिक विभागातील कर्मचाऱ्यांच्या कार्याचे वरिष्ठ अधिकाऱ्यांनी कौतुक केले आहे.
