बेळगाव | प्रतिनिधी
टिळकवाडी पोलीस ठाण्याच्या हद्दीतील आरपीडी सर्कलजवळ असलेल्या देशमुख रोडवरील एका हॉटेलमध्ये घडलेल्या चोरीच्या घटनेचा तपास अखेर पोलीसांनी यशस्वीरीत्या उलगडला आहे. या प्रकरणी हुबळी येथील एका सराईत चोरट्याला अटक करण्यात आली असून त्याच्याकडून सुमारे एक लाख रुपयांचा मुद्देमाल जप्त करण्यात आला आहे.
अविनाश रायरसंग (वय अंदाजे ३०, रा. विद्यानगर, हुबळी) असे अटक करण्यात आलेल्या आरोपीचे नाव असून त्याच्यावर यापूर्वीही चोरीचे गुन्हे दाखल असल्याची माहिती पोलिस सूत्रांनी दिली आहे. संबंधित हॉटेलमध्ये चोरी झाल्याबाबत तक्रार दाखल होताच टिळकवाडी पोलिसांनी तातडीने तपासाची चक्रे फिरवली.
तांत्रिक माहिती व गोपनीय सूत्रांच्या आधारे संशयित आरोपीचा माग काढत पोलिसांनी त्याला हुबळी येथून ताब्यात घेतले. चौकशीत आरोपीने चोरीची कबुली दिल्यानंतर त्याच्याकडून ८.४८ ग्रॅम वजनाची सोन्याची साखळी (किंमत अंदाजे ९५ हजार रुपये) तसेच ८ हजार रुपये किमतीचा मोबाईल फोन जप्त करण्यात आला. एकूण १ लाख ३ हजार रुपयांचा ऐवज पोलिसांनी हस्तगत केला आहे.
टिळकवाडी पोलिसांच्या या तत्पर कारवाईचे शहरात कौतुक होत असून पुढील तपास सुरू असल्याचे पोलिसांनी स्पष्ट केले आहे.
