बेळगाव जिल्ह्यातील अगसगे गावात कौटुंबिक वादातून थेट हत्येपर्यंत पोहोचलेल्या घटनेने परिसर हादरला आहे. शनिवारी रात्री झालेल्या या प्रकारात संतापाच्या भरात नातवाने स्वतःच्या आजीवर धारदार चाकूने वार केल्याची माहिती समोर आली आहे.
या हल्ल्यात गंभीर जखमी झालेल्या बाळव्वा कलगौडा पाटील (वय ७०) यांचा उपचारादरम्यान मृत्यू झाला. या प्रकरणी कलगौडा अप्पय्यागौडा पाटील (वय २४) याच्याविरोधात खुनाचा गुन्हा दाखल करण्यात आला असून काकती पोलिसांनी त्याला ताब्यात घेतल्याची माहिती मिळाली आहे.
पोलिसांच्या प्राथमिक तपासानुसार, घरातील किरकोळ कारणावरून आजी आणि नातवामध्ये जोरदार वाद झाला होता. वाद वाढत गेल्यानंतर संतप्त झालेल्या तरुणाने घरातील चाकू उचलून आजीवर वार केल्याचे समोर आले आहे.
घटनेनंतर जखमी अवस्थेतील वृद्ध महिलेला तातडीने रुग्णालयात दाखल करण्यात आले. मात्र डॉक्टरांनी तपासणीनंतर त्यांना मृत घोषित केले.
घटनास्थळी पोहोचलेल्या काकती पोलिसांनी पंचनामा करून मृतदेह शवविच्छेदनासाठी जिल्हा रुग्णालयात पाठविला आहे. वरिष्ठ पोलिस अधिकाऱ्यांनीही घटनास्थळी भेट देऊन पाहणी केली असून पुढील तपास सुरू आहे.
