नवी दिल्ली : जागतिक पातळीवर तणाव वाढला की सोन्याच्या किमतीत उसळी येते, हा आतापर्यंतचा अनुभव. मात्र यावेळी चित्र पूर्णपणे वेगळं दिसत आहे. अमेरिका-इस्रायल आणि इराण यांच्यातील संघर्षाच्या पार्श्वभूमीवर सोन्याचे दर वाढण्याऐवजी मोठ्या प्रमाणात घसरले आहेत.
इंडियन बुलियन अँड ज्वेलर्स असोसिएशन (IBJA) च्या माहितीनुसार, आज बाजार सुरू होताच 24 कॅरेट सोन्याचा दर प्रति 10 ग्रॅम सुमारे ₹1,35,141 पर्यंत खाली आला. मागील बंद दराच्या तुलनेत सुरुवातीलाच जवळपास ₹12,000 ची घसरण नोंदवली गेली. चांदीच्या किमतीतही मोठी घट दिसून आली असून ती ₹2,01,500 प्रति किलोपर्यंत खाली आली आहे.
विशेष म्हणजे, मागील 50 दिवसांपासून सोन्याच्या दरात सातत्याने घट होत असून या कालावधीत जवळपास 25 टक्क्यांची घसरण झाली आहे. चांदीच्या दरात तर तब्बल 50 टक्क्यांपर्यंत घसरण झाल्याची नोंद आहे.
याआधी सोन्याने विक्रमी उंची गाठली होती. प्रति 10 ग्रॅम ₹1,76,121 हा उच्चांक गाठल्यानंतर आता किमतीत जवळपास ₹40,000 पेक्षा जास्त घट झाली आहे. त्यामुळे गुंतवणूकदारांसाठी सध्याचा काळ सोनं खरेदी करण्यासाठी योग्य असल्याची चर्चा बाजारात रंगू लागली आहे.
तज्ज्ञांच्या मते, आंतरराष्ट्रीय बाजारातील बदल, डॉलरची स्थिती आणि गुंतवणूकदारांचा कल यावर पुढील काळातील सोन्याचे दर अवलंबून असतील.
