बेळगाव :
घरबसल्या रोजगाराचे आमिष दाखवून शेकडो महिलांची आणि काही ऑटोचालकांची फसवणूक करणाऱ्या भामट्याला शहापूर पोलिसांनी अखेर गजाआड केले आहे. अगरबत्ती पॅकिंगचे काम देतो असे सांगून या आरोपीने महिलांकडून आगाऊ पैसे घेऊन लाखो रुपयांचा गंडा घातला होता.
‘बी.एम. ग्रुप महिला गृहोद्योग’ या नावाने संस्थेचा बनावट गृहोद्योग सुरू असल्याचे दाखवून प्रत्येक महिलेकडून ₹2,500 रुपये नोंदणी शुल्क म्हणून घेतले जात होते. त्यानंतर “काम मिळाल्यावर ₹3,000 मजुरी दिली जाईल” असे आश्वासन दिले जात होते. मात्र, पैसे घेतल्यानंतर काम न देता आरोपी फरार झाला.
या फसवणुकीमुळे शेकडो महिलांनी जिल्हाधिकारी कार्यालयावर मोर्चा काढून न्यायाची मागणी केली होती. तसेच पोलिस आयुक्तांना निवेदन देऊन आरोपीला अटक करण्याचा इशारा दिला होता.
या प्रकरणी लक्ष्मी आनंद कांबळे (रा. पाटील गल्ली, खासबाग) यांनी 25 ऑक्टोबर 2025 रोजी शाहापूर पोलीस ठाण्यात फिर्याद दाखल केली होती. तपासादरम्यान आरोपीचे नाव बाबासाहेब लक्ष्मण कोळेकर (वय 35, रा. जाळोळी, ता. पंढरपूर, सध्या पुऱसंघी, पुणे) असे समोर आले.
4 नोव्हेंबर 2025 रोजी शहापूर पोलीस निरीक्षक एस. एस. सीमानी यांच्या मार्गदर्शनाखाली पोलिसांनी या आरोपीला बेड्या ठोकल्या. या तपासात पीएसआय मणिकंठ पुजारी, श्रीमती एस. एन. बसवा, मनोज भजंत्री (सीसीबी) तसेच एस. एम. गुडडाईगोल, श्रीधर तळवार, अजीत शिपूरे आणि रमेश अक्की (तांत्रिक पथक) यांनी सक्रिय सहभाग नोंदवला.
या पथकाच्या कार्याची बेळगाव शहर पोलिस आयुक्तांनी प्रशंसा केली असून पुढील तपास सुरू आहे. पोलिसांनी नागरिकांना विनंती केली आहे की, रोजगाराच्या आमिषाला बळी न पडता संस्थेची पडताळणी करूनच व्यवहार करावा.
