बेळगाव शहरात शुक्रवारी पहाटे घडलेल्या एका धक्कादायक घटनेने परिसरात खळबळ उडाली. ज्येष्ठ वैद्यकीय तज्ज्ञ डॉ. दिनेश लक्ष्मण भटकळ (वय ७९) यांनी स्वतःवर गोळी झाडून जीवन संपवल्याची घटना उघडकीस आली आहे.
मिळालेल्या माहितीनुसार, डॉ. भटकळ हे मूळचे उत्तर कन्नड जिल्ह्यातील अंकोला तालुक्याचे रहिवासी होते. अनेक वर्षे वैद्यकीय क्षेत्रात सेवा बजावल्यानंतर ते बेळगावमध्ये स्थायिक झाले होते. शांत, साधे आणि मनमिळाऊ व्यक्तिमत्त्व म्हणून त्यांची ओळख होती.
शुक्रवारी सकाळच्या सुमारास त्यांनी आपल्या घराच्या बाल्कनीत स्वतःवर गोळी झाडल्याचे समोर आले. गोळीबाराचा आवाज ऐकताच कुटुंबीय आणि शेजारी तातडीने घटनास्थळी धावले. मात्र, त्यावेळी त्यांचा मृत्यू झाल्याचे निदर्शनास आले.
प्राथमिक तपासात दीर्घकाळाच्या आजारपणामुळे आणि मानसिक तणावातून त्यांनी हे टोकाचे पाऊल उचलले असावे, असा अंदाज पोलिसांकडून व्यक्त करण्यात येत आहे. तथापि, आत्महत्येमागील नेमके कारण तपासानंतर स्पष्ट होणार असल्याचे अधिकाऱ्यांनी सांगितले.
घटनेची माहिती मिळताच टिळकवाडी पोलिस ठाण्याचे अधिकारी घटनास्थळी दाखल झाले. पंचनामा करून पुढील तपास सुरू करण्यात आला आहे.
