बेळगाव :
बेळगाव ग्रामीण पोलिसांनी जुगाराविरोधात कारवाई करत बोकनूर परिसरात सुरू असलेल्या जुगार अड्ड्यावर छापा टाकला. या कारवाईत आठ जणांना ताब्यात घेण्यात आले असून त्यांच्याकडून रोख रक्कम आणि जुगारासाठी वापरण्यात येणारे साहित्य जप्त करण्यात आले आहे.
पोलिसांनी दिलेल्या माहितीनुसार, १५ जून रोजी बेळगाव तालुक्यातील बोकनूर गावाच्या हद्दीतील सावगाव तलावाच्या काठाजवळील सार्वजनिक मोकळ्या जागेत काही व्यक्ती पैशांच्या देवाणघेवाणीत पत्त्यांचा जुगार खेळत असल्याची माहिती मिळाली होती.
या माहितीच्या आधारे बेळगाव ग्रामीण पोलीस ठाण्याचे निरीक्षक नागनगौड कट्टीमनिगौडर यांच्या नेतृत्वाखाली पथकाने घटनास्थळी धाड टाकली. यावेळी आठ जणांना ताब्यात घेण्यात आले.
कारवाईदरम्यान पोलिसांनी २३ हजार ५०० रुपयांची रोकड तसेच पत्त्यांचा संच जप्त केला आहे. संबंधित आरोपींविरोधात कर्नाटक पोलीस कायदा १९६३ मधील कलम ८७ अंतर्गत बेळगाव ग्रामीण पोलीस ठाण्यात गुन्हा दाखल करण्यात आला असून पुढील तपास सुरू आहे.
या कारवाईबद्दल पोलीस आयुक्त आणि पोलीस उपायुक्तांनी बेळगाव ग्रामीण पोलिसांच्या पथकाचे कौतुक केले आहे.
