महाबळेश्वर हनुमाननगर परिसरातील रहिवासी प्रियांका चेतन अजरेकर यांनी आपल्या घरासमोर उभी केलेली किआ सेल्टोस कार चोरीला गेल्याची तक्रार एपीएमसी पोलिस ठाण्यात दाखल केली होती. त्यानंतर भारतीय न्याय संहिता 2023 अंतर्गत गुन्हा नोंदवून पोलिसांनी तातडीने तपास सुरू केला.
पोलीस आयुक्त आणि वरिष्ठ अधिकाऱ्यांच्या मार्गदर्शनाखाली एपीएमसी पोलिसांचे विशेष पथक तयार करण्यात आले. तपासादरम्यान पोलिसांनी महाराष्ट्रातील मुंबईपर्यंत धाव घेत चोरीस गेलेली किआ सेल्टोस कार हस्तगत केली. याच तपासात धारवाड सब-अर्बन पोलिस ठाण्याच्या हद्दीतून चोरीस गेलेली हुंडाई क्रेटा कारही सापडली.
दोन्ही वाहने चोरी करून आरोपी घटनास्थळावरून फरार झाले असून त्यांचा शोध सुरू आहे. पोलिसांनी जप्त केलेल्या वाहनांमध्ये सुमारे 14 लाखांची किआ सेल्टोस आणि 15 लाखांची हुंडाई क्रेटा कारचा समावेश आहे.
या कारवाईत पीएसआय एस. के. होळेन्नवर, एएसआय एम. ए. पाटील तसेच पोलिस कर्मचारी डी. सी. सागर, बसवराज नरगुंद, गोविंदप्पा पुजार, रफीक मुजावर, शिवाजी चव्हाण आणि रमेश पाटील यांनी महत्त्वाची भूमिका बजावली. वरिष्ठ पोलिस अधिकाऱ्यांनी पथकाचे कौतुक केले आहे.
