बेळगावातील युनियन जिमखाना येथे असलेल्या रमी क्लबमध्ये नुकत्याच घडलेल्या गोळीबाराच्या घटनेनंतर संरक्षण विभागाने मोठी कारवाई करत युनियन जिमखान्याला सील केले आहे. ही कारवाई लष्कर, कॅन्टोन्मेंट बोर्ड आणि स्थानिक पोलिसांच्या बंदोबस्तात पार पडली.
मिळालेल्या माहितीनुसार, मंगळवारी रात्री रमी क्लबमध्ये गोळीबाराची घटना घडली होती. प्राथमिक स्तरावर हा प्रकार जुगार व्यवसायातील वर्चस्वाच्या वादातून घडल्याची चर्चा असली, तरी याबाबत अधिकृत तपास सुरू आहे.
दरम्यान, ज्या जागेवर युनियन जिमखाना कार्यरत होता ती संरक्षण विभागाची मालमत्ता असल्याचे सांगितले जाते. या जागेचा भाडेपट्टा (लीज) 2002 मध्ये संपुष्टात आला होता. त्यानंतर हे प्रकरण न्यायालयात प्रलंबित होते.
अलीकडेच न्यायालयाने युनियन जिमखान्याची याचिका फेटाळल्यानंतर संरक्षण विभागाने जागेचा ताबा घेण्याची प्रक्रिया सुरू केली होती.
गोळीबाराच्या घटनेनंतर या कारवाईला वेग आला आणि अखेर लष्करी जवानांच्या उपस्थितीत जागा अधिकृतपणे ताब्यात घेण्यात आली.
डिफेन्स इस्टेट ऑफिसर यांनी प्रसिद्ध केलेल्या पत्रकात युनियन जिमखान्याची जागा संरक्षण विभागाच्या ताब्यात घेतल्याची माहिती दिली आहे.
