3 लाखांच्या कर्जावर 18.60 लाखांचे व्याज; तरीही धमक्या... बेळगावात दोघे अटकेत

बेळगाव | D Media

बेळगाव जिल्ह्यात बेकायदेशीर मीटर व्याजाच्या व्यवहारांवर पोलिसांनी धडक कारवाई करत दोन जणांना अटक केली आहे. कर्जाच्या मोबदल्यात लाखो रुपयांची व्याजवसुली करूनही आणखी पैशांसाठी कर्जदाराला धमक्या देत मानसिक छळ केल्याचा गंभीर आरोप या प्रकरणात समोर आला आहे.

रायबाग तालुक्यातील रोहिदास गल्ली येथील विठ्ठल तुकाराम माने यांनी पोलिसांकडे दिलेल्या तक्रारीनुसार, त्यांनी काही काळापूर्वी 3.10 लाख रुपयांचे कर्ज घेतले होते. या कर्जाच्या बदल्यात त्यांनी आतापर्यंत 18.60 लाख रुपये व्याजापोटी अदा केले. मात्र एवढी मोठी रक्कम भरल्यानंतरही आरोपींकडून आणखी पैशांची मागणी सुरूच होती. पैसे न दिल्यास जीवे मारण्याच्या धमक्या देत सातत्याने मानसिक त्रास दिला जात असल्याचा आरोप त्यांनी केला.

तक्रारीची गंभीर दखल घेत पोलिसांनी तत्काळ तपास सुरू केला. तपासादरम्यान आदित्य अशोक भोसले आणि अभिषेक अशोक भोसले यांना अटक करण्यात आली. या प्रकरणातील आणखी एक संशयित आरोपी अद्याप फरार असून त्याचा शोध सुरू आहे.

या प्रकरणी रायबाग पोलीस ठाण्यात गुन्हा दाखल करण्यात आला असून, बेकायदेशीर सावकारी आणि मीटर व्याजाच्या व्यवहारांविरोधात कठोर कारवाई सुरू राहणार असल्याचे पोलिसांकडून सांगण्यात आले आहे.

कर्जदारांची आर्थिक पिळवणूक करणाऱ्या अशा बेकायदेशीर सावकारीविरोधात नागरिकांनी निर्भयपणे तक्रार करण्याचे आवाहनही करण्यात येत आहे.