बेळगाव : तालुक्यातील सांबरा गावात आज शुक्रवार, २ जानेवारी रोजी सकाळी साडेआठच्या सुमारास घडलेल्या एका भीषण अपघातात इयत्ता सातवीत शिकणाऱ्या विद्यार्थिनीचा विजेचा धक्का लागून मृत्यू झाल्याची दुर्दैवी घटना समोर आली आहे. या घटनेमुळे संपूर्ण गावावर शोककळा पसरली असून नागरिकांमधून तीव्र हळहळ व्यक्त केली जात आहे.
परिणीती चंद्रकांत पालकर (वय १२, रा. महात्मा फुले गल्ली, सांबरा) असे मृत विद्यार्थिनीचे नाव आहे. शुक्रवारी सकाळी गावात नियमित पाणीपुरवठा सुरू असताना घरातील विद्युत मोटारीद्वारे पाणी भरले जात होते. पाणी भरल्यानंतर परिणीतीने मोटारीचा स्विच बंद केला; मात्र मुख्य विद्युत बटन बंद न करताच गॅलरीतील वायर ओढण्याचा प्रयत्न केल्याने तिला अचानक जोरदार विजेचा धक्का बसला.
या धक्क्याने परिणीती जागीच कोसळली. घटनेच्या वेळी तिची आई गावाबाहेर गेली होती, तर वडील कामानिमित्त बाहेर होते. प्रकार लक्षात येताच शेजाऱ्यांनी तात्काळ धाव घेत मुख्य वीजपुरवठा बंद केला व तिला उपचारासाठी रुग्णालयात नेण्यात आले. मात्र, उपचारापूर्वीच वाटेत तिचा मृत्यू झाला.
परिणीती ही गावातील मराठी प्राथमिक शाळेत इयत्ता सातवीत शिक्षण घेत होती. तिच्या अकाली मृत्यूमुळे पालकर कुटुंबावर दुःखाचा डोंगर कोसळला असून तिच्या पश्चात आई-वडील आणि एक मोठा भाऊ असा परिवार आहे.
या घटनेची नोंद मारीहाळ पोलीस स्थानकात करण्यात आली असून पुढील तपास सुरू आहे. या दुर्दैवी अपघातामुळे घरगुती विद्युत उपकरणांच्या वापरात सुरक्षिततेचे नियम पाळण्याची आवश्यकता पुन्हा एकदा अधोरेखित झाली आहे.
