बेळगाव : तालुक्यातील हंगरगा गावात शॉर्ट सर्किटमुळे लागलेल्या भीषण आगीत एका कुटुंबाचा संपूर्ण संसार भस्मसात झाल्याची हृदयद्रावक घटना घडली आहे. या आगीत Raju Bharm Patil यांच्या घरातील सर्व साहित्य जळून खाक झाले असून कुटुंब अक्षरशः उघड्यावर आले आहे.
मिळालेल्या माहितीनुसार, अचानक लागलेल्या आगीने काही क्षणांतच उग्र रूप धारण केले. घरातील वस्तू, कागदपत्रे तसेच मुलीच्या लग्नासाठी जपून ठेवलेले साहित्य पूर्णपणे नष्ट झाले. या घटनेमुळे कुटुंबावर मोठे आर्थिक आणि मानसिक संकट ओढवले आहे.
या दुर्दैवी घटनेची माहिती समजताच Laxmitai Foundation तातडीने मदतीसाठी पुढे सरसावले. फाउंडेशनच्या वतीने स्थानिक कार्यकर्त्यांमार्फत आर्थिक मदत देण्यात आली असून, कुटुंबाला दिलासा देण्याचा प्रयत्न करण्यात आला.
“अडचणीच्या काळात एकमेकांच्या पाठीशी उभे राहणे हीच खरी मानवता,” असा संदेश देत फाउंडेशनच्या प्रतिनिधींनी कुटुंबाला धीर दिला.
दरम्यान, या घटनेमुळे गावात हळहळ व्यक्त होत असून, राजू पाटील यांच्या कुटुंबाला या कठीण प्रसंगातून सावरण्याची शक्ती मिळावी, अशी प्रार्थना व्यक्त केली जात आहे.
