बेळगाव :जिल्हाधिकारी कार्यालयाच्या आवारासमोर आज दुपारी घडलेल्या घटनेने परिसरात खळबळ उडाली. दोन युवकांच्या गटांमध्ये सुरू असलेला वाद शांत करण्यासाठी गेलेल्या पोलिस कर्मचाऱ्यावरच काही युवकांनी हल्ला केल्याची घटना समोर आली आहे.
मिळालेल्या माहितीनुसार, जिल्हाधिकारी कार्यालयासमोर दोन गटांमध्ये शाब्दिक वाद सुरू होता. परिस्थिती नियंत्रणात आणण्यासाठी मार्केट पोलीस ठाण्याचे शिपाई मल्लिकार्जुन गुंजीकर घटनास्थळी गेले असता, काही युवकांनी अचानक त्यांच्यावर हल्ला केला.
घटनेची माहिती मिळताच मार्केट पोलीस ठाण्याचे निरीक्षक आणि पोलीस पथक तातडीने घटनास्थळी दाखल झाले. पोलिसांनी हस्तक्षेप करून परिस्थिती नियंत्रणात आणली.
हल्ल्यात सहभागी असलेल्या दोन्ही गटातील काही युवकांना पोलिसांनी ताब्यात घेतले असून त्यांची चौकशी सुरू आहे. तसेच या घटनेत सहभागी असलेल्या इतर संशयितांचा शोध घेण्यासाठी पोलिसांकडून तपास सुरू आहे.
या प्रकारामुळे जिल्हाधिकारी कार्यालय परिसरात काही काळ तणावाचे वातावरण निर्माण झाले होते. मात्र पोलिसांच्या तत्पर कारवाईमुळे परिस्थिती नियंत्रणात आली.
