बेळगाव : अवघ्या तीन वर्षांच्या कुमार नवतेज भूषण पालकर याने आपल्या विलक्षण बुद्धिमत्तेच्या जोरावर जागतिक विक्रमाची नोंद करत बेळगावच्या शिरपेचात मानाचा तुरा खोवला आहे. सावगाव रोड परिसरात राहणाऱ्या नवतेजने “चित्रांशिवाय केवळ टेक्स्टमधून १५ फळे आणि प्राण्यांची नावे सर्वात जलद वाचणे” या प्रकारात अवघ्या ३० सेकंदांत कामगिरी पूर्ण करत उल्लेखनीय यश संपादन केले.
या अनोख्या कामगिरीची दखल घेत नवतेजची नोंद प्रतिष्ठित Worldwide Book of Records मध्ये करण्यात आली आहे. इतक्या कमी वयात मिळालेल्या या यशामुळे पालकर कुटुंबावर अभिनंदनाचा वर्षाव होत आहे.
नवतेजच्या या यशामागे त्याचे वडील भूषण पालकर आणि आई प्रज्ञा पालकर यांचे सातत्यपूर्ण मार्गदर्शन, प्रेमळ संगोपन आणि मेहनत महत्त्वाची ठरली आहे. लहान वयापासूनच मुलाच्या बौद्धिक विकासाकडे विशेष लक्ष देत त्यांनी त्याला प्रोत्साहन दिले.
नवतेजच्या या उल्लेखनीय कामगिरीमुळे बेळगावसह संपूर्ण परिसरातून त्याचे कौतुक होत असून भविष्यात तो आणखी मोठी यशे संपादन करेल, असा विश्वास व्यक्त केला जात आहे.
