दिनांक 8 ऑगस्ट रोजी मराठी विद्यानिकेतन शाळेच्या इयत्ता आठवीच्या मुलांनी माहेश्वरी अंधशाळेला भेट दिली.तेथील विद्यार्थ्यांची शिकण्याची पद्धत, त्यांची शिस्त, स्वावलंबन आत्मविश्वास आणि जिद्द विद्यार्थ्यांना प्रत्यक्ष अनुभवता आली.दृष्टी नसली तरी स्वप्नांना आणि कर्तृत्वाला मर्यादा नसतात, याची जाणीव विद्यार्थ्यांना झाली. अनेक प्रश्न विचारून विद्यार्थ्यांनी आपल्या शंकांचे निरसन करून घेतलं.
प्रत्येक काम ते विशेष विद्यार्थी अत्यंत आत्मविश्वासाने आणि कौशल्याने करत होते. त्यांची शिकण्याची तळमळ पाहून विद्यार्थ्यांची कारणे आणि तक्रारी नक्कीच शुल्लक वाटू लागतात. या विशेष विद्यार्थ्यांनी संगणक हाताळून तबला, पेटीच्या सहाय्याने त्यांनी गीत गाऊन विद्यार्थ्यांचे स्वागत केले .ते विद्यार्थी क्रिकेट ,बुद्धिबळ खेळतात. हे सर्व खेळ कसे खेळतात ?याची माहिती विद्यार्थ्यांनी समजावून घेतली. त्यांची लिहिण्याची ,वाचनाची पद्धत समजावून घेतली आणि स्वतःला पडलेल्या अनेक प्रश्नांचे निरसन ही करून घेतले.
येणाऱ्या 15 ऑगस्टसाठी या विद्यार्थ्यांची पथसंचलनाच्या तयारीचे प्रात्यक्षिक पाहायला मिळाले . माहेश्वरी अंधशाळेच्या मुख्याध्यापिका अनिता गावडे यांचे विशेष सहकार्य लाभले.
या विशेष अभ्यास दौऱ्यासाठी शाळेचे माध्यमिक मुख्याध्यापक एन .सी .उडकेकर, प्राथमिक विभागाचे मुख्याध्यापक बी. जी. पाटील ,शिक्षण संयोजिका नीला आपटे, सविता पवार यांचे प्रोत्साहन लाभले. शिक्षक वर्ग माया पाटील , सरिता बांदेकर आणि महेश हगीदळे, विद्यार्थी यांनी विशेष परिश्रम घेतले.
