कणबर्गी परिसरात तलवार घेऊन फिरणारे तिघे जेरबंद
बेळगाव :
शहरात अलीकडे घडत असलेल्या वारंवार स्टॅबिंग प्रकारांमुळे बेळगावकरांमध्ये भीतीचे वातावरण निर्माण झाले होते. हीच पार्श्वभूमी लक्षात घेऊन माळमारुती पोलिसांनी गस्त वाढवून संशयितांवर नजर ठेवली आणि शनिवारी मोठी कारवाई केली.
20 सप्टेंबर 2025 रोजी रात्री कणबर्गी येथील क्रिकेट स्टेडियमजवळ गस्तीवर असलेल्या पथकाने संशयित मोटारसायकल अडवली. तपासणी दरम्यान बाइकवरून धारदार तलवार सापडली. पोलिसांनी तत्काळ कारवाई करत तिघा जणांना जेरबंद केले.
अटक केलेले आरोपी असे :
अरुण राम बाहेरकरी (32, ज्योतिर्लिंग गल्ली, कणबर्गी)
विक्रांत करप्पा नायक (28, मदकर गल्ली, कणबर्गी)
राहुल ज्योतिबा उचगावकर (31, सिद्धेश्वर नगर, कणबर्गी)
त्यांच्याकडून ₹15,000 किंमतीची हिरो होंडा मोटारसायकल आणि तलवार जप्त करण्यात आली आहे.
या प्रकरणी माळमारुती पोलीस ठाण्यात गुन्हा प्र.क्र.180/2025 दाखल करण्यात आला असून, भारतीय शस्त्र कायदा कलम 27(1) व केपी अॅक्ट कलम 97 अंतर्गत पुढील चौकशी सुरू आहे.
दरम्यान, या धाडसी कारवाईबद्दल शहराचे पोलिस आयुक्त आणि उपआयुक्त यांनी पथकाचे कौतुक केले असून, नागरिकांच्या सुरक्षेसाठी पोलिसांचे प्रयत्न सुरूच राहतील, असा विश्वास व्यक्त केला आहे.
