बेळगाव : शहरात वाढत्या ध्वनी प्रदूषणामुळे नागरिकांच्या आरोग्यावर व सार्वजनिक शांततेवर परिणाम होत असल्याच्या पार्श्वभूमीवर प्रशासनाने मोठा निर्णय घेतला आहे. जिल्हाधिकारी यांच्या आदेशानुसार, बेळगाव शहर व जिल्हा परिसरात उच्च डेसिबल डीजे, लाउडस्पीकर आणि इतर ध्वनीवर्धक उपकरणांच्या वापरावर तात्पुरती बंदी घालण्यात आली आहे.
7 मार्च 2026 रोजी जारी करण्यात आलेल्या आदेशानुसार, 75 डेसिबलपेक्षा अधिक आवाज निर्माण करणाऱ्या डीजे सिस्टीम, बेस बूस्टर, मोबाईल डीजे वाहने यांचा वापर पूर्णपणे प्रतिबंधित करण्यात आला आहे. हा निर्णय ध्वनी प्रदूषण (नियंत्रण व नियम) 2000 तसेच भारतीय नागरी सुरक्षा संहिता 2023 अंतर्गत घेण्यात आला आहे.
विशेषतः निवासी भाग, हॉस्पिटल, शाळा, न्यायालय आणि धार्मिक स्थळांच्या 100 मीटर परिसरातील ‘सायलेंट झोन’मध्ये तसेच वाहतूक दाट असलेल्या भागात डीजेचा वापर पूर्णपणे बंद करण्यात आला आहे. याशिवाय रात्री 10 ते सकाळी 6 या वेळेत कोणत्याही प्रकारच्या मोठ्या आवाजाच्या यंत्रणांना परवानगी नसणार आहे.
प्रशासनाने स्पष्ट केले आहे की, विवाह समारंभ, मिरवणुका, शाळा-कॉलेज कार्यक्रम किंवा इतर सार्वजनिक-खाजगी कार्यक्रमांसाठीही हे नियम लागू राहतील. ध्वनीवर्धक वापरण्यापूर्वी पोलिस विभाग व प्रदूषण नियंत्रण मंडळाची पूर्वपरवानगी घेणे बंधनकारक आहे.
नियमांचे उल्लंघन केल्यास संबंधित डीजे उपकरणे आणि वाहने जप्त करण्यात येतील. तसेच वीजपुरवठा खंडित करून आयोजकांवर गुन्हे दाखल करण्यात येणार आहेत.
नागरिकांना आवाहन करण्यात आले आहे की, कुठेही परवानगीपेक्षा जास्त आवाजाचा वापर होत असल्यास तात्काळ 112 किंवा पोलिस नियंत्रण कक्षाशी संपर्क साधावा.
