बेळगाव : शहरातील काही भागात रमजान निमित्त लावण्यात आलेल्या बॅनरवर इराणचे सर्वोच्च नेते अयातुल्ला अली खमेनी यांचे छायाचित्र असल्याचा आरोप करत श्रीराम सेनेने पोलिस आयुक्तांकडे लेखी तक्रार दाखल केली आहे.
संघटनेच्या पदाधिकाऱ्यांनी दिलेल्या निवेदनानुसार, बेळगावातील गांधी नगर, देशपांडे गल्ली, खतलवाला दर्गा परिसर, कामत गल्ली, शहू नगर आणि कसाई गल्ली या भागांमध्ये संबंधित बॅनर लावण्यात आल्याचा दावा करण्यात आला आहे.
श्रीराम सेनेचे राष्ट्रीय अध्यक्ष प्रमोद मुतालिक यांच्या वतीने पोलिस प्रशासनाला या प्रकरणाची गंभीर दखल घेण्याची मागणी करण्यात आली आहे. या बॅनरमुळे सामाजिक वातावरण बिघडण्याची शक्यता असल्याचे संघटनेचे म्हणणे आहे.
तक्रारीत संबंधित बॅनर तात्काळ काढून टाकावेत तसेच ते लावणाऱ्या व्यक्तींवर कायदेशीर कारवाई करावी, अशी मागणी करण्यात आली आहे.
यासंदर्भात उत्तर कर्नाटक राज्याध्यक्ष रविकुमार कोकित्तर आणि उपाध्यक्ष विनय अंगो यांनीही प्रशासनाला इशारा देत, योग्य वेळी कारवाई झाली नाही तर संघटना आंदोलनाचा मार्ग स्वीकारू शकते, असे म्हटले आहे.
दरम्यान, परिस्थिती संवेदनशील असल्याने प्रशासनाने या प्रकरणाकडे लक्ष दिले असून पुढील कारवाईबाबत पोलिसांकडून अधिकृत माहिती अद्याप समोर आलेली नाही.
