बेळगाव येथे उत्तर परिक्षेत्राचे पोलिस महानिरीक्षक (आयजीपी) म्हणून वरिष्ठ आयपीएस अधिकारी संदीप पाटील यांनी गुरुवारी अधिकृतपणे पदभार स्वीकारला. मावळते आयजीपी डॉ. चेतनसिंग राठोड यांनी त्यांच्याकडे कार्यभार सुपूर्द केला.
राज्य सरकारने पंधरा दिवसांपूर्वी संदीप पाटील यांच्यासह अन्य काही आयपीएस अधिकाऱ्यांच्या बदलीचे आदेश जारी केले होते. मात्र काही तांत्रिक कारणांमुळे त्या आदेशाची अंमलबजावणी रखडली होती. बुधवारी नव्याने आदेश जारी करण्यात आल्यानंतर बदली प्रक्रिया पूर्ण झाली.
नवीन आदेशानुसार संदीप पाटील यांनी केएसआरपी डीआयजीपी पदाचा कार्यभार सी. के. बाबा यांच्याकडे सोपवून उत्तर परिक्षेत्राचे आयजीपी म्हणून जबाबदारी स्वीकारली.
गुरुवारी सायंकाळी झालेल्या पदभार स्वीकृती कार्यक्रमात बेळगावचे पोलिस आयुक्त भूषण बोरसे, जिल्हा पोलिसप्रमुख के. रामराजन तसेच पोलिस विभागातील अन्य वरिष्ठ अधिकारी उपस्थित होते.
दरम्यान, डॉ. चेतनसिंग राठोड हे आता सीआयडीचे आयजीपी म्हणून नवीन जबाबदारी स्वीकारणार आहेत.
