बेळगांव:सीमा सुरक्षा दलाच्या (BSF) शपथग्रहण समारंभात बेळगावच्या लेकीने कर्तृत्वाचा झेंडा फडकावला आहे. काल दिनांक 31 जानेवारी रोजी सिलिगुडी येथे पार पडलेल्या भव्य शपथग्रहण समारंभात कु. रोशनी वसंत मुळीक हिने तब्बल 400 युवक-युवतींच्या तुकडीचे परेड कमांडर म्हणून नेतृत्व करत विशेष मान मिळविला.
मुळची खानापूर तालुक्यातील ओलमनी येथील रहिवासी असलेली रोशनी सध्या शाहूनगर, कंग्राळी बी.के. येथे वास्तव्यास आहे. परेडदरम्यान दाखवलेल्या शिस्तबद्ध नेतृत्वगुणांमुळे आणि उत्कृष्ट ड्रिल कौशल्यामुळे रोशनीला या समारंभात ‘बेस्ट परेड कमांडर’ तसेच ‘बेस्ट ड्रिल’ हे प्रतिष्ठेचे पुरस्कार प्रदान करण्यात आले.
400 प्रशिक्षणार्थींमध्ये आपल्या नेतृत्वाने रोशनीने नारी शक्तीचा प्रभावी आवाज घुमवत उपस्थितांची मने जिंकली. रोशनी ही शाहूनगर येथील सामाजिक कार्यकर्त्या सौ. वैष्णवी वसंत मुळीक यांची कन्या असून, तिच्या या उल्लेखनीय यशामुळे संपूर्ण खानापूर तालुका व बेळगाव जिल्ह्यातून तिच्यावर अभिनंदनाचा वर्षाव होत आहे.
रोशनीचे यश हे ग्रामीण भागातील तरुणींसाठी प्रेरणादायी ठरत असून, देशसेवेच्या वाटेवर चालणाऱ्या नव्या पिढीसाठी ती आदर्श ठरत आहे.
