बी. के. मॉडेल शाळेच्या शतकमहोत्सवाच्या तयारीचा आढावा; आमदार असीफ (राजू) सेठ यांची भेट
बेळगाव (प्रतिनिधी):
बेळगावातील प्रतिष्ठित बी. के. मॉडेल हायस्कूल या शाळेचा शतकमहोत्सवी सोहळा येत्या २० ते २३ डिसेंबर या कालावधीत मोठ्या उत्साहात साजरा होणार आहे. या भव्य कार्यक्रमाच्या पूर्वतयारीचा आढावा घेण्यासाठी बेळगाव उत्तरचे आमदार असीफ (राजू) सेठ यांनी संस्थेला भेट दिली.
प्रारंभी संस्थेचे अध्यक्ष अविनाश पोतदार आणि सचिव श्रीनिवास शिवनगी यांनी आमदार सेठ यांचे पुष्पगुच्छ आणि स्मृतिचिन्ह देऊन स्वागत केले. बैठकीदरम्यान शतकमहोत्सवाच्या आयोजन, सुविधा आणि कार्यक्रम नियोजनासंदर्भात सविस्तर चर्चा झाली.
आमदार सेठ यांनी संस्थेच्या उपक्रमांचे कौतुक करत, “बी. के. मॉडेल शाळेने शिक्षणाच्या क्षेत्रात उल्लेखनीय योगदान दिले आहे. या ऐतिहासिक शतकमहोत्सवाच्या यशासाठी माझ्याकडून सर्वतोपरी सहकार्य राहील,” असे आश्वासन दिले.
या प्रसंगी संस्थेचे पदाधिकारी, शाळांचे मुख्याध्यापक, शिक्षक व माजी विद्यार्थी मोठ्या संख्येने उपस्थित होते.
