बेळगाव, प्रतिनिधी : शिवसेना (उद्धव बाळासाहेब ठाकरे) पक्षाचे उपनेते आणि कोल्हापूर-सिंधुदुर्ग संपर्कप्रमुख अरुणभाई दूधवडकर यांनी बेळगाव दौऱ्यादरम्यान युवा समितीचे अध्यक्ष शुभम शेळके यांच्या निवासस्थानी भेट देत सीमाभागातील विविध प्रश्नांवर चर्चा केली.
सिंधुदुर्ग आणि कोल्हापूर दौऱ्यावर असताना त्यांनी बेळगावला अल्पकालीन भेट दिली. यावेळी सीमाभागातील मराठी भाषिकांवर होत असलेल्या कथित सक्तीच्या कारवाया, स्थानिक स्वराज्य संस्थांच्या काही निर्णयांमुळे निर्माण झालेल्या समस्या तसेच बेळगाव महापालिकेच्या कार्यपद्धतीबाबत त्यांना सविस्तर माहिती देण्यात आली.
युवा समितीच्या पदाधिकाऱ्यांनी सीमावासीयांच्या भावना आणि अपेक्षा मांडत हा विषय राज्य पातळीवर पोहोचवण्याची विनंती केली. त्यावर प्रतिक्रिया देताना अरुणभाई दूधवडकर यांनी सीमाभागातील नागरिकांचा संदेश शिवसेना पक्षप्रमुख उद्धव ठाकरे यांच्यापर्यंत निश्चितपणे पोहोचवण्याचे आश्वासन दिले.
तसेच, सीमावासीयांच्या प्रश्नांबाबत शिवसेना आणि उद्धव ठाकरे यांची भूमिका पूर्वीप्रमाणेच ठाम राहील, असा विश्वास त्यांनी व्यक्त केला. सीमाभागातील मराठी जनतेच्या न्याय्य मागण्यांसाठी पक्ष कायम पाठिंबा देत राहील, असेही त्यांनी स्पष्ट केले.
या भेटीदरम्यान सीमाप्रश्नासह विविध सामाजिक आणि स्थानिक प्रश्नांवरही सकारात्मक चर्चा झाल्याचे सूत्रांनी सांगितले.
