बेळगावच्या दसरा सीमोल्लंघन सोहळ्याची पूर्वतयारी सुरू – मनपा आयुक्तांना महामंडळाचे निवेदन
बेळगाव : मध्यवर्ती सार्वजनिक नवरात्र दसरा महोत्सव महामंडळाच्या वतीने 2 ऑक्टोबर 2025 रोजी होणाऱ्या पारंपरिक सीमोल्लंघन सोहळ्याच्या यशस्वी आयोजनासाठी आज, 24 सप्टेंबर रोजी महापालिका आयुक्त बी. शुभा यांना निवेदन सादर करण्यात आले.
शतकानुशतके चालत आलेली बेळगावची दसरा परंपरा म्हैसूर नंतर सर्वाधिक प्रतिष्ठेने साजरी केली जाते. दरवर्षी प्रमाणेच यंदाही "सीमोल्लंघन मैदान" (मराठी विद्यानिकेतन मैदान, कॅम्प) येथे विजयादशमीचा सोहळा शिस्तबद्ध आणि भव्य स्वरूपात पार पडणार आहे. गेल्या काही वर्षांत महामंडळाने दसरा सोहळ्याला भव्यतेसह शिस्तबद्धता दिल्यामुळे शहरातील भक्तगण आणि नागरिकांमध्ये विशेष उत्साह दिसून येतो.
यंदाच्या आयोजनासाठी मनपा आयुक्तांसह महापौर मंगेश पवार, उपमहापौर वाणी जोशी तसेच उत्तर विधानसभा क्षेत्राचे आमदार राजू शेठ यांनाही निवेदन देण्यात आले आहे.
या वेळी महामंडळाचे मानद अध्यक्ष रमाकांत कोंडुस्कर, अध्यक्ष प्राचार्य आनंद आपटेकर, स्वागत अध्यक्ष व माजी महापौर मालोजीराव अष्टेकर, जनसंपर्क प्रमुख विकास कलघटगी, कार्याध्यक्ष अंकुश केसरकर, मल्लेश चौगुले, तसेच बेळगावातील विविध देवस्थानचे पदाधिकारी परशुराम किल्लेकर, श्रीनाथ पवार, मृगेंद्र अंगडी, गौतम पाटील, सुनील बोकडे, आनंद पाटील आदी उपस्थित होते.
यंदाही हा ऐतिहासिक विजयादशमीचा सोहळा शहरवासीयांच्या सहभागामुळे अधिक आकर्षक व संस्मरणीय होईल, असा विश्वास व्यक्त करण्यात आला.
