शहर काँग्रेस अध्यक्षपदाच्या निवडीची प्रक्रिया अंतिम टप्प्यात पोहोचत असतानाच बेळगाव जिल्हा काँग्रेसमधील अंतर्गत मतभेद पुन्हा एकदा उघडकीस आले आहेत. मंगळवारी जिल्हा काँग्रेस कार्यालयात झालेल्या बैठकीत दोन गटांतील समर्थकांमध्ये तीव्र शाब्दिक खडाजंगी झाल्याने काही काळ वातावरण तणावपूर्ण बनले.
एआयसीसीच्या मार्गदर्शनाखाली गेल्या दोन दिवसांपासून शहराध्यक्ष निवडीसंदर्भात स्थानिक पदाधिकारी, लोकप्रतिनिधी आणि कार्यकर्त्यांची मते जाणून घेण्याची प्रक्रिया सुरू आहे. मात्र अध्यक्षपदासाठी कोणाला संधी द्यावी, यावर एकमत होत नसल्याने विविध गटांतील मतभेद स्पष्टपणे समोर येत आहेत.
बैठकीदरम्यान माजी नगरसेवक फईम नाईकवाडी आणि विद्यमान नगरसेवक अजीम पटवेगार यांच्या समर्थकांमध्ये शाब्दिक वाद रंगला. परिस्थिती अधिक चिघळण्याची शक्यता निर्माण होताच बेळगाव उत्तरचे आमदार आसिफ सेठ यांनी तातडीने हस्तक्षेप करत दोन्ही गटांतील नेत्यांशी चर्चा केली. पक्षाची प्रतिमा आणि संघटनात्मक हित लक्षात घेऊन संयम राखण्याचे आवाहन त्यांनी केले. अंतिम निर्णय पक्षाच्या हायकमांडकडूनच घेतला जाईल, असेही त्यांनी स्पष्ट केले.
विशेष म्हणजे, याच अध्यक्ष निवड प्रक्रियेदरम्यान सोमवारीही जिल्हा काँग्रेस कार्यालयात दोन गटांमध्ये मोठा गोंधळ झाल्याची घटना समोर आली होती. त्यावेळी धक्काबुक्की आणि मारामारी झाल्याचे आरोप करण्यात आले होते. सलग दुसऱ्या दिवशीही वाद निर्माण झाल्याने बेळगाव शहर काँग्रेसमधील गटबाजी पुन्हा चर्चेचा विषय ठरली आहे.
दरम्यान, शहराध्यक्षपदाची धुरा अखेर कोणाकडे सोपवली जाणार, याकडे आता पक्षातील कार्यकर्ते आणि राजकीय वर्तुळाचे लक्ष लागले आहे.
