बेळगाव :
कन्नड सक्तीच्या विरोधात महाराष्ट्र एकीकरण समितीच्या वतीने २२ जून रोजी आयोजित करण्यात येणाऱ्या महामोर्चावरून बेळगावमध्ये राजकीय वातावरण तापले आहे.
महाराष्ट्र एकीकरण समितीच्या महामोर्चाला परवानगी देऊ नये, अशी मागणी करत कर्नाटक रक्षण वेदिकेच्या कार्यकर्त्यांनी जिल्हाधिकारी कार्यालयात निवेदन सादर केले.
महाराष्ट्र एकीकरण युवा समितीकडून विविध बैठका घेऊन मराठी भाषिकांची दिशाभूल केली जात असल्याचा आरोप कर्नाटक रक्षण वेदिकेच्या कार्यकर्त्यांनी केला. महामोर्चाला परवानगी दिल्यास शहरातील कायदा आणि सुव्यवस्थेचा प्रश्न निर्माण होण्याची शक्यता असल्याचे निवेदनात नमूद करण्यात आले.
यावेळी समितीचे युवा नेते शुभम शेळके यांच्यावर कारवाई करून त्यांना हद्दपार करावे, तसेच महाराष्ट्र एकीकरण समिती आणि शिवसेनेवर बंदी घालावी, अशा मागण्याही करण्यात आल्या.
दरम्यान, जिल्हाधिकारी मोहम्मद रोशन यांनी प्रसारमाध्यमांशी बोलताना सांगितले की, महामोर्चासंदर्भात समितीच्या प्रतिनिधींशी चर्चा करण्यात आली आहे. नागरिकांनी शांततेत आपली भूमिका मांडावी आणि वाहतुकीला कोणताही अडथळा निर्माण होणार नाही याची काळजी घ्यावी, अशा सूचना देण्यात आल्याचे त्यांनी स्पष्ट केले.
कन्नड सक्तीविरोधात महाराष्ट्र एकीकरण समितीकडून २२ जूनच्या महामोर्चासाठी शहर तसेच ग्रामीण भागात जनजागृती सुरू आहे. या पार्श्वभूमीवर दोन्ही बाजूंनी निवेदने दिल्याने बेळगावमधील राजकीय हालचालींना वेग आला आहे.
