बेळगाव :
शारीरिक तंदुरुस्ती, मानसिक स्वास्थ्य आणि शिस्तबद्ध जीवनशैलीचा संदेश देत मराठा लाईट इन्फंट्री रेजिमेंटल सेंटर, बेळगाव यांच्या वतीने शिवाजी स्टेडियम येथे आंतरराष्ट्रीय योग दिन उत्साहात साजरा करण्यात आला.
यंदाच्या योग दिनाची संकल्पना “निरोगी वृद्धत्वासाठी योग” या विषयावर आधारित होती. या कार्यक्रमात लष्करी जवान, त्यांचे कुटुंबीय, मुले, नागरी संरक्षण कर्मचारी तसेच बॉईज स्पोर्ट्स कंपनीच्या कॅडेट्ससह तब्बल ८५० जणांनी सहभाग घेतला.
योग प्रशिक्षकांच्या मार्गदर्शनाखाली विविध योगासने आणि प्राणायामाचे प्रात्यक्षिक सादर करण्यात आले. योगामुळे शरीराची ताकद, लवचिकता, मानसिक स्थैर्य आणि जीवनातील सकारात्मकता वाढण्यास मदत होते, याबाबत उपस्थितांना मार्गदर्शन करण्यात आले.
वाढत्या वयात निरोगी शरीर आणि शांत मन राखण्यासाठी योगाचे महत्त्व या कार्यक्रमातून अधोरेखित करण्यात आले. भारतीय लष्कराकडून दैनंदिन जीवनात योगाचा समावेश करण्याचा संदेश या उपक्रमातून देण्यात आला.
आरोग्य, शिस्त आणि संतुलित जीवनशैलीचा संगम घडवणारा हा उपक्रम उपस्थितांसाठी प्रेरणादायी ठरला.
