बेळगाव | प्रतिनिधी
समाजोपयोगी उपक्रमांना चालना देण्याच्या उद्देशाने बेळगावातील एसजीबीआयटी महाविद्यालयात चाणक्य एज्युकेशन अँड सोशल वेल्फेअर सोसायटी आणि रोटरी क्लब ऑफ बेलगाव दर्पण यांच्या संयुक्त विद्यमाने मेगा रक्तदान शिबिराचे आयोजन करण्यात आले. या उपक्रमाला विद्यार्थी, स्वयंसेवक तसेच नागरिकांचा उत्स्फूर्त प्रतिसाद मिळाला.
चाणक्य एज्युकेशन अँड सोशल वेल्फेअर सोसायटीचे अध्यक्ष श्री. नागराज पाटील आणि रोटरी क्लब ऑफ बेलगाव दर्पणच्या अध्यक्षा डॉ. स्फूर्ती मस्तिहोळी यांच्या नेतृत्वाखाली आयोजित या शिबिराचा प्रमुख उद्देश स्वेच्छा रक्तदानाचे महत्त्व समाजापर्यंत पोहोचविणे आणि विशेषतः युवकांमध्ये रक्तदानाबाबत सकारात्मक जनजागृती निर्माण करणे हा होता.
शिबिरादरम्यान अनेक विद्यार्थी आणि नागरिकांनी उत्साहाने रक्तदान करून सामाजिक जबाबदारीची जाणीव व्यक्त केली. रक्तदानासारख्या जीवनदायी कार्यात सहभागी झालेल्या प्रत्येक रक्तदात्याचे आयोजकांनी विशेष कौतुक केले.
कार्यक्रमाच्या यशस्वी आयोजनासाठी एसजीबीआयटी महाविद्यालयाचे व्यवस्थापन, प्राध्यापक, कर्मचारी, स्वयंसेवक आणि सर्व सहकार्य करणाऱ्या टीमचे आयोजकांनी आभार मानले. समाजसेवेप्रती असलेली बांधिलकी आणि मानवतेची भावना जपणारा हा उपक्रम प्रेरणादायी ठरला.
