बेळगाव शहरात “स्वच्छ बेळगाव उत्सव” या नावाने आयोजित करण्यात येणाऱ्या मोठ्या कार्यक्रमापूर्वी प्रशासनाने कडक भूमिका घेतली आहे. जिल्हाधिकाऱ्यांकडून कार्यक्रमास परवानगी नाकारल्यानंतर आता महापालिकेनेही अनधिकृतरित्या लावण्यात आलेल्या बॅनर आणि जाहिरात फलकांवर धडक कारवाई केली.
शिवम असोसिएट्सतर्फे १७ मे रोजी सरदार्स मैदानावर सुमारे २५ हजार नागरिकांच्या उपस्थितीत कार्यक्रम आयोजित करण्याची तयारी सुरू होती. कार्यक्रमाच्या प्रचारासाठी शहरातील प्रमुख चौक, रस्ते आणि सार्वजनिक ठिकाणी मोठ्या प्रमाणात फ्लेक्स आणि बॅनर लावण्यात आले होते.
मात्र महापालिकेची पूर्वपरवानगी न घेता जाहिरात फलक उभारण्यात आल्याचे निदर्शनास आल्यानंतर पालिका प्रशासनाने तत्काळ कारवाई करत हे सर्व बॅनर हटवण्यास सुरुवात केली. शहराचे सौंदर्य बिघडवणारे आणि नियमांचे उल्लंघन करणारे कोणतेही फलक सहन केले जाणार नाहीत, असा इशाराही अधिकाऱ्यांनी दिला.
दरम्यान, कार्यक्रमासाठी आवश्यक प्रशासकीय मंजुरी, सुरक्षा व्यवस्था आणि नियमानुसार प्रक्रिया पूर्ण न झाल्याने जिल्हा प्रशासनाने यापूर्वीच कार्यक्रमाला परवानगी नाकारली होती. त्यानंतर महापालिकेच्या कारवाईमुळे आयोजकांना आणखी धक्का बसला आहे.
महापालिका आयुक्त कार्तिक एम. यांनी सांगितले की, शहरात अनधिकृत फ्लेक्स आणि बॅनर लावण्याविरोधात पुढील काळातही सातत्याने मोहीम राबवली जाणार आहे.
