बेळगावातील शिवबसव नगर परिसरात कार्यरत असलेल्या शिवम असोसिएट्स या संस्थेशी संबंधित कार्यालयांवर जिल्हा प्रशासन आणि पोलिसांनी संयुक्त कारवाई करत मोठ्या आर्थिक व्यवहारांची चौकशी सुरू केली आहे. संस्थेचे प्रमुख शिवारंद नीलण्णावर यांच्याशी संबंधित विविध कागदपत्रे, डिजिटल नोंदी आणि आर्थिक व्यवहार तपास यंत्रणांनी ताब्यात घेतल्याची माहिती समोर आली आहे.
अधिकाऱ्यांच्या प्राथमिक तपासानुसार, नागरिकांकडून आकर्षक परताव्याचे आश्वासन देत मोठ्या प्रमाणावर ठेवी स्वीकारण्यात आल्याचा संशय आहे. गुंतवणूकदारांना वार्षिक सुमारे 36 टक्क्यांपर्यंत परतावा देण्याचे आमिष दाखवले जात असल्याची माहिती तपास यंत्रणांकडे पोहोचली आहे. या व्यवहारांमध्ये हजारो कोटी रुपयांची उलाढाल झाल्याचा अंदाज व्यक्त केला जात आहे.
‘पॉन्झी पद्धती’चा संशय काय?
तपास अधिकाऱ्यांच्या मते, नव्या गुंतवणूकदारांकडून जमा होणारी रक्कम जुन्या गुंतवणूकदारांना परतावा देण्यासाठी वापरली जात असल्याचा संशय व्यक्त करण्यात येत आहे. प्रत्यक्ष व्यवसायातून नफा न कमावता अशा प्रकारची साखळी चालत असल्यास ती व्यवस्था नव्या पैशांवरच अवलंबून राहते आणि पुढे आर्थिक संकट निर्माण होऊ शकते.
45 हजार गुंतवणूकदारांचा अंदाज
या प्रकरणात सुमारे 45 हजार नागरिकांनी गुंतवणूक केल्याचा अंदाज व्यक्त केला जात आहे. यात निवृत्त सैनिक, माजी जवान तसेच विविध भागांतील सर्वसामान्य गुंतवणूकदारांचाही समावेश असल्याची माहिती समोर येत आहे.
कोण आहेत शिवारंद नीलण्णावर?
शिवारंद नीलण्णावर हे सार्वजनिक कार्यक्रम, क्रिकेट स्पर्धा, आरोग्य शिबिरे आणि सामाजिक उपक्रमांमुळे चर्चेत आले होते. रिअल इस्टेट, कमोडिटी ट्रेडिंग आणि आयात-निर्यात क्षेत्रातही त्यांचा सहभाग असल्याचे सांगितले जाते.
त्यांनी 2022 मध्ये प्रदर्शित झालेल्या ‘Champion’ या कन्नड चित्रपटाची निर्मितीही केली होती. मागील काही महिन्यांत सोशल मीडियावर त्यांच्या भाषणांची मोठी चर्चा झाली होती. विविध वादग्रस्त दावे आणि राजकीय विधानांमुळे ते सतत चर्चेत राहिले.
KPID कायद्यानुसार तपास
या प्रकरणात KPID कायद्याअंतर्गत तपास सुरू असून अधिकाऱ्यांना बँक खाती तपासण्याचा, मालमत्ता पडताळणी करण्याचा, डिजिटल पुरावे जप्त करण्याचा तसेच आवश्यक असल्यास आर्थिक व्यवहार गोठवण्याचा अधिकार आहे. जप्त करण्यात आलेल्या नोंदींची तपासणी पूर्ण झाल्यानंतर आणखी धक्कादायक माहिती समोर येण्याची शक्यता व्यक्त केली जात आहे.
